main apne jurm ka jab etiraf karta hun

maiñ apne jurm kā jab e'tirāf kartā huuñ

har ek faisla apne ḳhilāf kartā huuñ

maiñ pahle detā huuñ tartīb halqa-e-ahbāb

phir apne logoñ ko apne ḳhilāf kartā huuñ

maiñ kaise maan luuñ har baat āsmāñ terī

zamīn-zād huuñ so iḳhtilāf kartā huuñ

ajiib tarah kī dekhī hai raushnī ḳhud meñ

maiñ ek umr se apnā tavāf kartā huuñ

maiñ māntā huuñ ki mujh se bhī hotī rahtī haiñ

so dostoñ kī ḳhatā.eñ muaaf kartā huuñ

main apne jurm ka jab e'tiraf karta hun

har ek faisla apne KHilaf karta hun

main pahle deta hun tartib halqa-e-ahbab

phir apne logon ko apne KHilaf karta hun

main kaise man lun har baat aasman teri

zamin-zad hun so iKHtilaf karta hun

ajib tarah ki dekhi hai raushni KHud mein

main ek umr se apna tawaf karta hun

main manta hun ki mujh se bhi hoti rahti hain

so doston ki KHataen muaf karta hun