main apni anaon mein giraftar bahut hun

maiñ apnī anāoñ meñ giraftār bahut huuñ

kahtā to nahīñ tālib-e-dīdār bahut huuñ

lagtā hai use us se mujhe pyaar nahīñ hai

martā huuñ usī par maiñ talabgār bahut huuñ

lagtā hai use ḳhud se mujhe pyaar bahut hai

kaise ye kahūñ ḳhud se maiñ bezār bahut huuñ

masrūf huuñ itnā ki maiñ ḳhud se nahīñ miltā

nazroñ meñ zamāne kī maiñ bekār bahut huuñ

lagtā hai zamāne ko maiñ darvesh-sifat huuñ

lekin maiñ haqīqat meñ gunahgār bahut huuñ

dikhne meñ to maiñ rustam-o-suhrāb kī sūrat

andar se ye hālat hai ki bīmār bahut huuñ

nafrat hai zamāne se maiñ rahtā huuñ akelā

ho sohbat-e-yārāñ to maiñ darkār bahut huuñ

ḳhāmosh agar huuñ to maiñ sard-āboñ kā baasī

mimbar pe maiñ aa.uuñ to dhuāñ-dhār bahut huuñ

dikhtā hai mujhe saaf jahāñ ab maiñ khaḌā huuñ

jāhil huuñ magar vāqif-e-asrār bahut huuñ

'shāhid' hai mirā naam shahīdoñ kī safoñ meñ

ai mere vatan asl meñ ġhaddār bahut huuñ

main apni anaon mein giraftar bahut hun

kahta to nahin talib-e-didar bahut hun

lagta hai use us se mujhe pyar nahin hai

marta hun usi par main talabgar bahut hun

lagta hai use KHud se mujhe pyar bahut hai

kaise ye kahun KHud se main bezar bahut hun

masruf hun itna ki main KHud se nahin milta

nazron mein zamane ki main bekar bahut hun

lagta hai zamane ko main darwesh-sifat hun

lekin main haqiqat mein gunahgar bahut hun

dikhne mein to main rustam-o-suhrab ki surat

andar se ye haalat hai ki bimar bahut hun

nafrat hai zamane se main rahta hun akela

ho sohbat-e-yaran to main darkar bahut hun

KHamosh agar hun to main sard-abon ka basi

mimbar pe main aaun to dhuan-dhaar bahut hun

dikhta hai mujhe saf jahan ab main khaDa hun

jahil hun magar waqif-e-asrar bahut hun

'shahid' hai mera nam shahidon ki safon mein

ai mere watan asl mein ghaddar bahut hun