main aur ham-aghosh hun us rashk-e-pari se

maiñ aur ham-āġhosh huuñ us rashk-e-parī se

kab is kī tavaqqo.a mujhe be-bāl-o-parī se

jāgeñge nasīb apne na āh-e-saharī se

āgāh haiñ us aah kī ham be-asarī se

hai vasl kī ḳhvāhish tujhe us rashk-e-parī se

hairāñ huuñ maiñ ai dil tirī behūda-sarī se

īmān meñ zāhid ke bhī aa jaa.e tazalzul

dekhe jo mirā but use kāfir-nazarī se

in āñkhoñ ke raste se mire dil meñ chale aa.e

is tarah ġharaz pahuñche vo ḳhushkī meñ tarī se

qāsid se na bardāsht hue un ke mazālim

baaz aayā vo āḳhir mirī paiġhām-barī se

āñchal kī havā de koī is ġhuncha-e-dil ko

vā ho nahīñ saktā ye nasīm-e-saharī se

ye shīsha-e-dil deñ to ham ai tifl-e-parī-rū

par is meñ na baal aa.e tirī be-hunarī se

hosh uḌ ga.e jaatā rahā qaabū se dil apnā

āñkheñ jo mirī chaar huiiñ ek parī se

kab haath uThā kar maiñ duā vasl kī māñgūñ

fursat hai junūñ meñ kab inheñ jāma-zarī se

baazū bhī hilā.e bahut aur paañv bhī paTke

par uḌ na sakī chaal tirī kabk-e-darī se

'ranjūr' na hogā maraz-e-ishq se jāñ-bar

ai chāragar ab haath uThā chāragarī se

main aur ham-aghosh hun us rashk-e-pari se

kab is ki tawaqqoa mujhe be-baal-o-pari se

jagenge nasib apne na aah-e-sahari se

aagah hain us aah ki hum be-asari se

hai wasl ki KHwahish tujhe us rashk-e-pari se

hairan hun main ai dil teri behuda-sari se

iman mein zahid ke bhi aa jae tazalzul

dekhe jo mera but use kafir-nazari se

in aankhon ke raste se mere dil mein chale aae

is tarah gharaz pahunche wo KHushki mein tari se

qasid se na bardasht hue un ke mazalim

baz aaya wo aaKHir meri paigham-bari se

aanchal ki hawa de koi is ghuncha-e-dil ko

wa ho nahin sakta ye nasim-e-sahari se

ye shisha-e-dil den to hum ai tifl-e-pari-ru

par is mein na baal aae teri be-hunari se

hosh uD gae jata raha qabu se dil apna

aankhen jo meri chaar huin ek pari se

kab hath uTha kar main dua wasl ki mangun

fursat hai junun mein kab inhen jama-zari se

bazu bhi hilae bahut aur panw bhi paTke

par uD na saki chaal teri kabk-e-dari se

'ranjur' na hoga maraz-e-ishq se jaan-bar

ai chaaragar ab hath uTha chaaragari se