main aur hun mera dil-e-diwana aur hai

maiñ aur huuñ mirā dil-e-dīvāna aur hai

afsāna aur hāsil-e-afsāna aur hai

dīvāngī pe ab mirī hañstā nahīñ koī

sab jānte haiñ fitrat-e-dīvāna aur hai

us sham.a-rū kī bazm ke ādāb dekhiye

ik jal chukā to dūsrā parvāna aur hai

dil bhar gayā hai ab mirā dasht-e-hayāt se

shāyad nigāh meñ koī vīrāna aur hai

mujh ko huā hai tajraba-e-zindagī kuchh aur

duniyā jo kah rahī hai vo afsāna aur hai

jab ham pe band ho ga.e dair-o-haram ke dar

tab raaz ye khulā dar-e-jānāna aur hai

'shādāñ' kiyā to hai use paane kā hausla

ab ehtiyāj-e-jur.at-e-rindāna aur hai

main aur hun mera dil-e-diwana aur hai

afsana aur hasil-e-afsana aur hai

diwangi pe ab meri hansta nahin koi

sab jaante hain fitrat-e-diwana aur hai

us shama-ru ki bazm ke aadab dekhiye

ek jal chuka to dusra parwana aur hai

dil bhar gaya hai ab mera dasht-e-hayat se

shayad nigah mein koi virana aur hai

mujh ko hua hai tajraba-e-zindagi kuchh aur

duniya jo kah rahi hai wo afsana aur hai

jab hum pe band ho gae dair-o-haram ke dar

tab raaz ye khula dar-e-jaanana aur hai

'shadan' kiya to hai use pane ka hausla

ab ehtiyaj-e-jurat-e-rindana aur hai