main banane baiThta hun kuchh to ban jata hai kuchh

maiñ banāne baiThtā huuñ kuchh to ban jaatā hai kuchh

kār-e-ḳhilqat meñ kabhī hotā bhalā aisā hai kuchh

roz-e-mahshar ai ḳhudā is baat kā rakhnā ḳhayāl

maiñ ne duniyā meñ tirī boyā thā kuchh kaaTā hai kuchh

nūr-e-āgāhī kī gahrā.ī abhī pūchho nahīñ

dām-e-māhiyat meñ ye insāñ abhī uljhā hai kuchh

aaj phir se koī āshiq ramz-e-irfāñ pā gayā

aaj phir se mahfil-e-ḳhūbāñ meñ sannāTā hai kuchh

ātish-e-ulfat meñ jalne kā maza lene to de

raakh merī mat uḌā mujh ko abhī jalnā hai kuchh

jaañ nikalne kī duā do mujh ko marne kī nahīñ

jaañ nikalnā aur kuchh hai aur mar jaanā hai kuchh

yaad karte ho bahut tanhā.ī meñ ab bhī mujhe

maan bhī jaao tumhārā aur mirā rishta hai kuchh

ḳhair ho qāsid tirī kyā ḳhuub hai aamad kā vaqt

aa pahuñchtā hai tū tab jab zaḳhm-e-dil bhartā hai kuchh

bas yahī kah deñge gar pūchhā gayā ham se savāl

dil ke armāñ ko kabhī kuchlā hai kuchh paalā hai kuchh

kyoñ bhalā 'mansūr' kī taḳhlīq meñ aa.e kamāl

us kī niyyat meñ hai kuchh kahtā hai kuchh kartā hai kuchh

main banane baiThta hun kuchh to ban jata hai kuchh

kar-e-KHilqat mein kabhi hota bhala aisa hai kuchh

roz-e-mahshar ai KHuda is baat ka rakhna KHayal

main ne duniya mein teri boya tha kuchh kaTa hai kuchh

nur-e-agahi ki gahrai abhi puchho nahin

dam-e-mahiyat mein ye insan abhi uljha hai kuchh

aaj phir se koi aashiq ramz-e-irfan pa gaya

aaj phir se mahfil-e-KHuban mein sannaTa hai kuchh

aatish-e-ulfat mein jalne ka maza lene to de

rakh meri mat uDa mujh ko abhi jalna hai kuchh

jaan nikalne ki dua do mujh ko marne ki nahin

jaan nikalna aur kuchh hai aur mar jaana hai kuchh

yaad karte ho bahut tanhai mein ab bhi mujhe

man bhi jao tumhaara aur mera rishta hai kuchh

KHair ho qasid teri kya KHub hai aamad ka waqt

aa pahunchta hai tu tab jab zaKHm-e-dil bharta hai kuchh

bas yahi kah denge gar puchha gaya hum se sawal

dil ke arman ko kabhi kuchla hai kuchh pala hai kuchh

kyon bhala 'mansur' ki taKHliq mein aae kamal

us ki niyyat mein hai kuchh kahta hai kuchh karta hai kuchh