main bata bata ke bhi thak gaya main bhala nahin

maiñ batā batā ke bhī thak gayā maiñ bhalā nahīñ

vo jo ḳhauf thā tirī aañkh meñ vo gayā nahīñ

tirī qurbatoñ kā nashāt apnī jagah magar

vo jo zaḳhm hijr kī den thā vo bharā nahīñ

ka.ī hādse mire jism-o-jāñ pe guzar ga.e

mujhe jaane kis kī thī bad-du'ā maiñ marā nahīñ

ye bajā ki rizq bahut milā hameñ qaid meñ

jo yaqīn apne paroñ pe thā vo rahā nahīñ

mirā gaañv ūñchī 'imāratoñ se to bhar gayā

jo sukūn kachche gharoñ meñ thā vo milā nahīñ

tire kaam ā.eñge shām-e-‘umr meñ jān-e-man

mirī baat sun ye ḳhutūt mere jalā nahīñ

ye laraztī aañkh meñ sharm kī jo fasīl hai

yahī āḳhirī mirā aasrā ye girā nahīñ

tirā saath gar maiñ na de sakā to burā huā

maiñ burā nahīñ huuñ burā nahīñ huuñ burā nahīñ

main bata bata ke bhi thak gaya main bhala nahin

wo jo KHauf tha teri aankh mein wo gaya nahin

teri qurbaton ka nashat apni jagah magar

wo jo zaKHm hijr ki den tha wo bhara nahin

kai hadse mere jism-o-jaan pe guzar gae

mujhe jaane kis ki thi bad-du'a main mara nahin

ye baja ki rizq bahut mila hamein qaid mein

jo yaqin apne paron pe tha wo raha nahin

mera ganw unchi 'imaraton se to bhar gaya

jo sukun kachche gharon mein tha wo mila nahin

tere kaam aaenge sham-e-‘umr mein jaan-e-man

meri baat sun ye KHutut mere jala nahin

ye larazti aankh mein sharm ki jo fasil hai

yahi aaKHiri mera aasra ye gira nahin

tera sath gar main na de saka to bura hua

main bura nahin hun bura nahin hun bura nahin