main bazm-e-tasawwur mein use lae hue tha

maiñ bazm-e-tasavvur meñ use laa.e hue thā

jo saath na aane kī qasam khaa.e hue thā

dil jurm-e-mohabbat se kabhī rah na sakā baaz

hālāñki bahut baar sazā paa.e hue thā

ham chāhte the koī sune baat hamārī

ye shauq hameñ ghar se nikalvā.e hue thā

hone na diyā ḳhud pe musallat use maiñ ne

jis shaḳhs ko jī jaan se apnā.e hue thā

baiThe the 'shu.ūr' aaj mire paas vo gum-sum

maiñ kho.e hue thā na unheñ paa.e hue thā

main bazm-e-tasawwur mein use lae hue tha

jo sath na aane ki qasam khae hue tha

dil jurm-e-mohabbat se kabhi rah na saka baz

haalanki bahut bar saza pae hue tha

hum chahte the koi sune baat hamari

ye shauq hamein ghar se nikalwae hue tha

hone na diya KHud pe musallat use main ne

jis shaKHs ko ji jaan se apnae hue tha

baiThe the 'shuur' aaj mere pas wo gum-sum

main khoe hue tha na unhen pae hue tha