main bhaTakta hi raha dasht-e-shanasai mein

maiñ bhaTaktā hī rahā dasht-e-shanāsā.ī meñ

koī utrā hī nahīñ ruuh kī gahrā.ī meñ

kyā milāyā hai batā jām-e-pazīrā.ī meñ

ḳhuub nashsha hai tirī hausla-afzā.ī meñ

terī yādoñ kī suī prem kā dhāga merā

kaam aa.e haiñ bahut zaḳhmoñ kī turpā.ī meñ

Das rahī hai ye siyah raat kī nāgin mujh ko

bhar rahī zahr ḳhamoshī rag-e-tanhā.ī meñ

surma-e-makr-o-fareb āñkhoñ meñ jab se hai lagā

tab se hai ḳhuub izāfa had-e-bīnā.ī meñ

fikr-o-fan rang-e-taġhazzul na ġhazal kī ḳhushbū

bas lagā rahtā huuñ maiñ qāfiya-paimā.ī meñ

siikh paanī se hunar kaam 'anīs' aa.egā

dauḌ kar ḳhud hī chalā aatā hai gahrā.ī meñ

main bhaTakta hi raha dasht-e-shanasai mein

koi utra hi nahin ruh ki gahrai mein

kya milaya hai bata jam-e-pazirai mein

KHub nashsha hai teri hausla-afzai mein

teri yaadon ki sui prem ka dhaga mera

kaam aae hain bahut zaKHmon ki turpai mein

Das rahi hai ye siyah raat ki nagin mujh ko

bhar rahi zahr KHamoshi rag-e-tanhai mein

surma-e-makr-o-fareb aankhon mein jab se hai laga

tab se hai KHub izafa had-e-binai mein

fikr-o-fan rang-e-taghazzul na ghazal ki KHushbu

bas laga rahta hun main qafiya-paimai mein

sikh pani se hunar kaam 'anis' aaega

dauD kar KHud hi chala aata hai gahrai mein