main bhi hun tang kab se tum bhi ho tang kab se

maiñ bhī huuñ tang kab se tum bhī ho tang kab se

hālāt kī sipah se jaarī hai jang kab se

merī samā.atoñ se Takrā rahe the har-dam

ḳhāmosh ho ga.e haiñ vo jal-tarang kab se

dasht-e-safar meñ kitne tūfān sar se guzre

tanhā bhaTak rahī hai kaT kar patang kab se

sūraj kī raushnī hai jugnū na lams-e-tābāñ

hai tan-badan se lipTī andhī surang kab se

sab log pyaas ke haiñ jangal meñ ġharq shāyad

rah rah ke chīḳhtā hai ye ang ang kab se

ḳhushbū ke silsile kā rishta thā jis se qaa.em

le kar hujūm meñ hai vo bhī to sang kab se

chal kar 'zafar' chhuḌā deñ kuchh āb-e-tāza de deñ

har lahza khā rahā hai zehnoñ ko zang kab se

main bhi hun tang kab se tum bhi ho tang kab se

haalat ki sipah se jari hai jang kab se

meri samaaton se Takra rahe the har-dam

KHamosh ho gae hain wo jal-tarang kab se

dasht-e-safar mein kitne tufan sar se guzre

tanha bhaTak rahi hai kaT kar patang kab se

suraj ki raushni hai jugnu na lams-e-taban

hai tan-badan se lipTi andhi surang kab se

sab log pyas ke hain jangal mein gharq shayad

rah rah ke chiKHta hai ye ang ang kab se

KHushbu ke silsile ka rishta tha jis se qaem

le kar hujum mein hai wo bhi to sang kab se

chal kar 'zafar' chhuDa den kuchh aab-e-taza de den

har lahza kha raha hai zehnon ko zang kab se