main bikhar na jaun waraq waraq mujhe taq-e-dil mein sajaiye

maiñ bikhar na jā.ūñ varaq varaq mujhe tāq-e-dil meñ sajā.iye

mirā harf harf hai be-bahā mujhe is tarah na miTā.iye

hai kudūratoñ ke hisār meñ ye mohabbatoñ kā hasīñ nagar

ye dayār-e-āb-e-hayāt hai ise sam-kada na banā.iye

koī aks tak na Thahar sakā mirī chashm-e-fikr-o-ḳhayāl meñ

abhī ajnabī se haiñ ḳhāl-o-ḳhad mujhe aa.ina na dikhā.iye

pas-e-zulm aap kī baḳhshisheñ ye ināyateñ ye saḳhvāteñ

koī maañg baiThe na ḳhūñ-bahā ye lahū ke daaġh chhupā.iye

ho diloñ meñ husn-e-qalandarī ho zabāñ pe na.ara-e-sarmadī

jo hilā de taḳht-e-sikandarī vahī kaj-kulāhī dikhā.iye

hai ḳhizāñ kī zad pe abhī talak ruḳh-e-'sumbul' dil-e-yāsmīñ

abhī intizār kā vaqt hai abhī jashn-e-gul na manā.iye

main bikhar na jaun waraq waraq mujhe taq-e-dil mein sajaiye

mera harf harf hai be-baha mujhe is tarah na miTaiye

hai kuduraton ke hisar mein ye mohabbaton ka hasin nagar

ye dayar-e-ab-e-hayat hai ise sam-kada na banaiye

koi aks tak na Thahar saka meri chashm-e-fikr-o-KHayal mein

abhi ajnabi se hain KHal-o-KHad mujhe aaina na dikhaiye

pas-e-zulm aap ki baKHshishen ye inayaten ye saKHwaten

koi mang baiThe na KHun-baha ye lahu ke dagh chhupaiye

ho dilon mein husn-e-qalandari ho zaban pe nara-e-sarmadi

jo hila de taKHt-e-sikandari wahi kaj-kulahi dikhaiye

hai KHizan ki zad pe abhi talak ruKH-e-'sumbul' dil-e-yasmin

abhi intizar ka waqt hai abhi jashn-e-gul na manaiye