main chahta hun ki har shai yahan sanwar jae

maiñ chāhtā huuñ ki har shai yahāñ sañvar jaa.e

tumhārī ruuh mirī ruuh meñ utar jaa.e

vo ik ḳhayāl jo thoḌā malāl jaisā hai

tire qarīb se guzre agar nikhar jaa.e

dahak rahā hai jo mujh meñ alaav barsoñ se

zarā sā aañkh meñ bhar le koī to mar jaa.e

zamāne-bhar se vo begāna ho hī jā.egā

koī hayāt kī mānind jab mukar jaa.e

vo ek ḳhvāb jise gungunātā rahtā huuñ

kabhī to aa ke mirī aañkh meñ Thahar jaa.e

phir us ke ba.ad maiñ sochūñgā apne hone kā

jo darmiyān hai lamha zarā nithar jaa.e

kabhī hamīd bulā.e kabhī use 'sājid'

akelā chāñd batāo kidhar kidhar jaa.e

main chahta hun ki har shai yahan sanwar jae

tumhaari ruh meri ruh mein utar jae

wo ek KHayal jo thoDa malal jaisa hai

tere qarib se guzre agar nikhar jae

dahak raha hai jo mujh mein alaw barson se

zara sa aankh mein bhar le koi to mar jae

zamane-bhar se wo begana ho hi jaega

koi hayat ki manind jab mukar jae

wo ek KHwab jise gungunata rahta hun

kabhi to aa ke meri aankh mein Thahar jae

phir us ke baad main sochunga apne hone ka

jo darmiyan hai lamha zara nithar jae

kabhi hamid bulae kabhi use 'sajid'

akela chand batao kidhar kidhar jae