main chala hun DhunDhta manzilen mujhe aashna ki talash hai

maiñ chalā huuñ DhūñDhtā manzileñ mujhe āshnā kī talāsh hai

mirī is jabīn-e-niyāz ko tire naqsh-e-pā kī talāsh hai

vo fazā-e-ishq pe hai nazar jo vasī.a se ho vasī.a-tar

abhī intihā kā hai zikr kyā abhī ibtidā kī talāsh hai

jo nisār pā-e-hasīñ huā jo ġhubār ban ke bhī uḌ chukā

rah-e-be-ḳhudī meñ mujhe usī dil-e-mubtalā kī talāsh hai

sabhī rahmateñ jo sameT le jo huā na ho kisī aur se

mujhe us gunāh kī hai justujū mujhe us ḳhatā kī talāsh hai

maiñ hī sar-ba-sajda rahā karūñ maiñ tavāf-e-shauq kiyā karūñ

jo ḳhudā na ho kisī aur kā mujhe us ḳhudā kī talāsh hai

abhī mai-kade se haiñ nisbateñ abhī haiñ sukūn kī kāvisheñ

abhī ḳhaam hai mirā soz-e-ġham mujhe intihā kī talāsh hai

ye bajā ki husn ko naaz hai ye durust ishq ko faḳhr hai

jo sarāpā ḳhud ho jalā 'nishā' mujhe us vafā kī talāsh hai

main chala hun DhunDhta manzilen mujhe aashna ki talash hai

meri is jabin-e-niyaz ko tere naqsh-e-pa ki talash hai

wo faza-e-ishq pe hai nazar jo wasia se ho wasia-tar

abhi intiha ka hai zikr kya abhi ibtida ki talash hai

jo nisar pa-e-hasin hua jo ghubar ban ke bhi uD chuka

rah-e-be-KHudi mein mujhe usi dil-e-mubtala ki talash hai

sabhi rahmaten jo sameT le jo hua na ho kisi aur se

mujhe us gunah ki hai justuju mujhe us KHata ki talash hai

main hi sar-ba-sajda raha karun main tawaf-e-shauq kiya karun

jo KHuda na ho kisi aur ka mujhe us KHuda ki talash hai

abhi mai-kade se hain nisbaten abhi hain sukun ki kawishen

abhi KHam hai mera soz-e-gham mujhe intiha ki talash hai

ye baja ki husn ko naz hai ye durust ishq ko faKHr hai

jo sarapa KHud ho jala 'nisha' mujhe us wafa ki talash hai