main chanchal iThlati nadiya bhanwar se kab tak bachti main

maiñ chanchal iThlātī nadiyā bhañvar se kab tak bachtī maiñ

lahr lahr meñ Duub ke ubhrī ubhar ubhar ke Duubī maiñ

maiñ koī patthar to nahīñ thī mujh ko chhūkar bhī dekhā

barf ko thoḌī aañch to miltī aap hī aap pighaltī maiñ

añg lagā kar bedardī ne aag sī bhar dī nas nas meñ

TuuT ga.e sab laaj ke ghuñghrū aisā jhuum ke nāchī maiñ

prem ke bandhan meñ bañdh kar sājan itnī duurī kyuuñ

tum bhī pyāse pyāse bādal pyāsī pyāsī dhartī maiñ

aane vaale dvaar pe pahroñ dastak de kar lauT ga.e

haath meñ le kar paḌhne baiThī jab pirītam kī chiTThī maiñ

sannāTe meñ jab jab chhankī bairī paḌosan kī paa.el

jaane vaale yaad meñ terī raat rāt-bhar jaagī maiñ

kyā andhā vishvās thā ai 'nasrīn' vo mujh ko manā legā

har bandhan se chhūT gayā vo haa.e kyuuñ us se rūThī maiñ

main chanchal iThlati nadiya bhanwar se kab tak bachti main

lahr lahr mein Dub ke ubhri ubhar ubhar ke Dubi main

main koi patthar to nahin thi mujh ko chhukar bhi dekha

barf ko thoDi aanch to milti aap hi aap pighalti main

ang laga kar bedardi ne aag si bhar di nas nas mein

TuT gae sab laj ke ghunghru aisa jhum ke nachi main

prem ke bandhan mein bandh kar sajan itni duri kyun

tum bhi pyase pyase baadal pyasi pyasi dharti main

aane wale dwar pe pahron dastak de kar lauT gae

hath mein le kar paDhne baiThi jab piritam ki chiTThi main

sannaTe mein jab jab chhanki bairi paDosan ki pael

jaane wale yaad mein teri raat raat-bhar jagi main

kya andha wishwas tha ai 'nasrin' wo mujh ko mana lega

har bandhan se chhuT gaya wo hae kyun us se ruThi main