main charagh-e-shab-e-hasti hun ziya kya mangun

maiñ charāġh-e-shab-e-hastī huuñ ziyā kyā māñgūñ

zinda rahnā hai to chalne ke sivā kyā māñgūñ

tohfa-e-chāk-e-garebāñ ke sivā kyā māñgūñ

tujh se ai fasl-e-junūñ tū hī batā kyā māñgūñ

maiñ ne chāhā hai tujhe apne irādoñ kī tarah

aur maiñ apne irādoñ kā sila kyā māñgūñ

phuul meñ nuur nahīñ chāñd meñ ḳhushbū hī nahīñ

in nazāroñ se tirā husn-e-adā kyā māñgūñ

kitne aañsū haiñ mire ġham ko sajāne ke liye

aaj kī raat sitāroñ se ziyā kyā māñgūñ

apne hī ḳhuun meñ Duubā huā paikar huuñ maiñ

maiñ kisī aur se rangīn qabā kyā māñgūñ

zaḳhm-e-ehsās lahū de to bahār aatī hai

ġhuncha-e-dil ke liye mauj-e-sabā kyā māñgūñ

merī qismat meñ to shāyad koī patthar bhī nahīñ

vahshat-e-dil kā kisī se maiñ sila kyā māñgūñ

dil kā har dāġh-e-tamannā hai charāġh-e-manzil

'badr' maiñ chāñd-sitāroñ se ziyā kyā māñgūñ

main charagh-e-shab-e-hasti hun ziya kya mangun

zinda rahna hai to chalne ke siwa kya mangun

tohfa-e-chaak-e-gareban ke siwa kya mangun

tujh se ai fasl-e-junun tu hi bata kya mangun

main ne chaha hai tujhe apne iradon ki tarah

aur main apne iradon ka sila kya mangun

phul mein nur nahin chand mein KHushbu hi nahin

in nazaron se tera husn-e-ada kya mangun

kitne aansu hain mere gham ko sajaane ke liye

aaj ki raat sitaron se ziya kya mangun

apne hi KHun mein Duba hua paikar hun main

main kisi aur se rangin qaba kya mangun

zaKHm-e-ehsas lahu de to bahaar aati hai

ghuncha-e-dil ke liye mauj-e-saba kya mangun

meri qismat mein to shayad koi patthar bhi nahin

wahshat-e-dil ka kisi se main sila kya mangun

dil ka har dagh-e-tamanna hai charagh-e-manzil

'badr' main chand-sitaron se ziya kya mangun