main chob-e-KHushk sahi waqt ka hun sahra mein

maiñ chob-e-ḳhushk sahī vaqt kā huuñ sahrā meñ

sahar pukārtī mujh ko to saath chaltā maiñ

mire vajūd meñ zinda sadī kā sannāTā

tah-e-zamīñ huuñ koī boltā sā dariyā maiñ

har ek zāviya mere lahū ke naam se hai

batā rahā huuñ na.ī vus.atoñ ko rastā maiñ

bahut se log to jiite hī jī ke marte haiñ

bas ek shaḳhs ki martā huuñ roz tanhā maiñ

tū aa.ina hai tirī zaat ajnabī to nahīñ

qarīb aa tujhe apnā dikhā.ūñ chehra maiñ

ye is takalluf-e-bejā kī kyā zarūrat hai

ki ek mish.al-e-jāñ thā ḳhushī se jaltā maiñ

na jaane kaun thā dasht-e-azal-abad meñ 'nisār'

jo apne aap se miltā to kyuuñ bichhaḌtā maiñ

main chob-e-KHushk sahi waqt ka hun sahra mein

sahar pukarti mujh ko to sath chalta main

mere wajud mein zinda sadi ka sannaTa

tah-e-zamin hun koi bolta sa dariya main

har ek zawiya mere lahu ke nam se hai

bata raha hun nai wusaton ko rasta main

bahut se log to jite hi ji ke marte hain

bas ek shaKHs ki marta hun roz tanha main

tu aaina hai teri zat ajnabi to nahin

qarib aa tujhe apna dikhaun chehra main

ye is takalluf-e-beja ki kya zarurat hai

ki ek mishal-e-jaan tha KHushi se jalta main

na jaane kaun tha dasht-e-azal-abad mein 'nisar'

jo apne aap se milta to kyun bichhaDta main