main dayar-e-qatilan ka ek tanha ajnabi

maiñ dayār-e-qātilāñ kā ek tanhā ajnabī

DhūñDhne niklā huuñ ḳhud apne hī jaisā ajnabī

āshnāoñ se savāl-e-āshnā.ī kar ke dekh

phir pata chal jā.egā hai kaun kitnā ajnabī

Dūbte mallāh tinkoñ se madad māñgā kiye

kashtiyāñ Dūbīñ to thī har mauj-e-dariyā ajnabī

mil jo mujh ko āfiyat kī bhiik dene aa.e the

kis se pūchhūñ kaun the vo āshnā yā ajnabī

be-muravvat shahriyoñ ne fāsle kam kar diye

varna pahle shahr ko lagtā thā sahrā ajnabī

ye munāfiq ruup kab se merī aadat ban gayā

mere chehre se hai kyuuñ merā sarāpā ajnabī

main dayar-e-qatilan ka ek tanha ajnabi

DhunDhne nikla hun KHud apne hi jaisa ajnabi

aashnaon se sawal-e-ashnai kar ke dekh

phir pata chal jaega hai kaun kitna ajnabi

Dubte mallah tinkon se madad manga kiye

kashtiyan Dubin to thi har mauj-e-dariya ajnabi

mil jo mujh ko aafiyat ki bhik dene aae the

kis se puchhun kaun the wo aashna ya ajnabi

be-murawwat shahriyon ne fasle kam kar diye

warna pahle shahr ko lagta tha sahra ajnabi

ye munafiq rup kab se meri aadat ban gaya

mere chehre se hai kyun mera sarapa ajnabi