main DhunDhta hun KHud apni manzil mera koi rahnuma nahin hai

maiñ DhūñDhtā huuñ ḳhud apnī manzil mirā koī rahnumā nahīñ hai

batā rahe haiñ vo raah mujh ko jinheñ ḳhud apnā patā nahīñ hai

tumhāre dāman meñ jazb hote hamāre aañsū to kyā burā thā

chalo use tum bhī bhuul jaao ye aarzū thī gila nahīñ hai

agarche maiñ ne miTā diyā hai vajūd apnā vafā meñ terī

ye vasl hai terī mehrbānī mirī vafā kā sila nahīñ hai

kabhī bahāroñ kā ġhalġhala hai kabhī hai ḳhauf-e-ḳhizāñ chaman meñ

visāl-o-hijrāñ kī pūchhte ho koī nayā silsila nahīñ hai

kushāda-dastī hai apnī fitrat jhijak tumheñ hai bas ik zarā sī

vo haath jo tum baḌhā rahe ho qarīb hai bas milā nahīñ hai

mohabbatoñ meñ hai ġharz kaisī jo dil hī badle meñ chāhte haiñ

diloñ ke saude jo kar rahe haiñ vo jaan leñ ye vafā nahīñ hai

chhupā jo rakkhā thā rāz-e-ulfat zabāñ pe inkār thā zarūrī

sadāqatoñ ke na imtihāñ lo ye jhuuT ab tak khulā nahīñ hai

main DhunDhta hun KHud apni manzil mera koi rahnuma nahin hai

bata rahe hain wo rah mujh ko jinhen KHud apna pata nahin hai

tumhaare daman mein jazb hote hamare aansu to kya bura tha

chalo use tum bhi bhul jao ye aarzu thi gila nahin hai

agarche main ne miTa diya hai wajud apna wafa mein teri

ye wasl hai teri mehrbani meri wafa ka sila nahin hai

kabhi bahaaron ka ghalghala hai kabhi hai KHauf-e-KHizan chaman mein

visal-o-hijran ki puchhte ho koi naya silsila nahin hai

kushada-dasti hai apni fitrat jhijak tumhein hai bas ek zara si

wo hath jo tum baDha rahe ho qarib hai bas mila nahin hai

mohabbaton mein hai gharz kaisi jo dil hi badle mein chahte hain

dilon ke saude jo kar rahe hain wo jaan len ye wafa nahin hai

chhupa jo rakkha tha raaz-e-ulfat zaban pe inkar tha zaruri

sadaqaton ke na imtihan lo ye jhuT ab tak khula nahin hai