main dida-war hun nazaron se baat karta hun

maiñ dīda-var huuñ nazāroñ se baat kartā huuñ

maiñ aatī jaatī bahāroñ se baat kartā huuñ

zamīñ pe haiñ ye gul-o-ḳhār mere ham-jolī

falak ke chāñd sitāroñ se baat kartā huuñ

mujhe vajūd kī bahtī nadī se nisbat hai

maiñ baañk baañk kagāroñ se baat kartā huuñ

mire hī sāmne sardī kī taan TuuTī hai

basantī saaz ke tāroñ se baat kartā huuñ

maiñ nā-subūr huuñ holī ke intizār meñ huuñ

badalte vaqt ke dhāroñ se baat kartā huuñ

dil-o-dimāġh meñ le kar gulāl ke bādal

maiñ rangā-rang phuvāroñ se baat kartā huuñ

main dida-war hun nazaron se baat karta hun

main aati jati bahaaron se baat karta hun

zamin pe hain ye gul-o-KHar mere ham-joli

falak ke chand sitaron se baat karta hun

mujhe wajud ki bahti nadi se nisbat hai

main bank bank kagaron se baat karta hun

mere hi samne sardi ki tan TuTi hai

basanti saz ke taron se baat karta hun

main na-subur hun holi ke intizar mein hun

badalte waqt ke dhaaron se baat karta hun

dil-o-dimagh mein le kar gulal ke baadal

main ranga-rang phuwaron se baat karta hun