main dil mein zaKHm uske phir sulagta chhoD aaya hun

maiñ dil meñ zaḳhm us ke phir sulagtā chhoḌ aaya huuñ

ki sehn-e-gulsitāñ meñ ik sharāra chhoḌ aaya huuñ

kaḌaktī dhuup meñ bādal barastā chhoḌ aaya huuñ

maiñ us kī aañkh meñ ashkoñ kā dariyā chhoḌ aaya huuñ

barā-e-rozgār aaya to huuñ pardes meñ lekin

kisī ko ghar kī chaukhaT par maiñ rotā chhoḌ aaya huuñ

diyā le kar chalā huuñ maiñ jahāñ meñ raushnī karne

magar apne ghar āñgan meñ añdherā chhoḌ aaya huuñ

amīroñ ne bhulā Daalā rivāyāt-e-qadīma ko

magar ghar meñ ġharīboñ ke maiñ parda chhoḌ aaya huuñ

vo jin ke siine meñ har dam ta.assub raqs kartā thā

diloñ meñ un ke bhī ulfat kā jazba chhoḌ aaya huuñ

nigāh-e-bad na paḌ jaa.e kahīñ sayyād kī yā-rab

maiñ apne ghoñsle meñ ek bachcha chhoḌ aaya huuñ

use mahrūmī-e-qurb-e-vafā kā kyā ho andāza

maiñ us ke paas yādoñ kā sahārā chhoḌ aaya huuñ

'hilāl' insāniyat jis par pashemāñ ho ke rotī hai

maiñ vo gulshan vo sahrā vo ilāqa chhoḌ aaya huuñ

main dil mein zaKHm us ke phir sulagta chhoD aaya hun

ki sehn-e-gulsitan mein ek sharara chhoD aaya hun

kaDakti dhup mein baadal barasta chhoD aaya hun

main us ki aankh mein ashkon ka dariya chhoD aaya hun

bara-e-rozgar aaya to hun pardes mein lekin

kisi ko ghar ki chaukhaT par main rota chhoD aaya hun

diya le kar chala hun main jahan mein raushni karne

magar apne ghar aangan mein andhera chhoD aaya hun

amiron ne bhula Dala riwayat-e-qadima ko

magar ghar mein gharibon ke main parda chhoD aaya hun

wo jin ke sine mein har dam tassub raqs karta tha

dilon mein un ke bhi ulfat ka jazba chhoD aaya hun

nigah-e-bad na paD jae kahin sayyaad ki ya-rab

main apne ghonsle mein ek bachcha chhoD aaya hun

use mahrumi-e-qurb-e-wafa ka kya ho andaza

main us ke pas yaadon ka sahaara chhoD aaya hun

'hilal' insaniyat jis par pasheman ho ke roti hai

main wo gulshan wo sahra wo ilaqa chhoD aaya hun