main duniya apne andar dekhta hun

maiñ duniyā apne andar dekhtā huuñ

yahīñ se saare manzar dekhtā huuñ

diye haiñ rang tasvīroñ ko itne

ki ab tasvīr ban kar dekhtā huuñ

mire chehra se niklā hai vo chehra

ki ā.īna mukarrar dekhtā huuñ

zamīñ kā māl-o-zar kyā dekhtā maiñ

kahāñ maiñ itnā jhuk kar dekhtā huuñ

vo lamha jo abhī aaya nahīñ hai

abhī se us ke tevar dekhtā huuñ

mujhe is jurm meñ andhā kiyā hai

ki bīnā.ī se baḌh kar dekhtā huuñ

nashāt-e-dīd thā āñkhoñ kā jaanā

ki ab pahle se behtar dekhtā huuñ

abhī kuchh maslahat baaqī hai shāyad

abhī tak dosh par sar dekhtā huuñ

mujhe luuTā hai itnā rahzanoñ ne

ki ab ḳhud ko tavangar dekhtā huuñ

maiñ vo pāmāl-e-sahv-e-kūza-gar huuñ

ki ik gardish barābar dekhtā huuñ

koī lauTā nahīñ hai jaane vaalā

magar ik ḳhvāb aksar dekhtā huuñ

maiñ tanhā laḌ rahā huuñ jang apnī

so pīchhe ek lashkar dekhtā huuñ

kisī se koī andesha nahīñ hai

yuuñ hī logoñ ke tevar dekhtā huuñ

ajab kyā hai koī āvāz aa.e

so meñ āvāz de kar dekhtā huuñ

main duniya apne andar dekhta hun

yahin se sare manzar dekhta hun

diye hain rang taswiron ko itne

ki ab taswir ban kar dekhta hun

mere chehra se nikla hai wo chehra

ki aaina mukarrar dekhta hun

zamin ka mal-o-zar kya dekhta main

kahan main itna jhuk kar dekhta hun

wo lamha jo abhi aaya nahin hai

abhi se us ke tewar dekhta hun

mujhe is jurm mein andha kiya hai

ki binai se baDh kar dekhta hun

nashat-e-did tha aankhon ka jaana

ki ab pahle se behtar dekhta hun

abhi kuchh maslahat baqi hai shayad

abhi tak dosh par sar dekhta hun

mujhe luTa hai itna rahzanon ne

ki ab KHud ko tawangar dekhta hun

main wo pamal-e-sahw-e-kuza-gar hun

ki ek gardish barabar dekhta hun

koi lauTa nahin hai jaane wala

magar ek KHwab aksar dekhta hun

main tanha laD raha hun jang apni

so pichhe ek lashkar dekhta hun

kisi se koi andesha nahin hai

yun hi logon ke tewar dekhta hun

ajab kya hai koi aawaz aae

so mein aawaz de kar dekhta hun