main dushman-e-jaan hun to bhula kyon nahin dete

maiñ dushman-e-jāñ huuñ to bhulā kyoñ nahīñ dete

is naqsh-e-tamannā ko miTā kyoñ nahīñ dete

bhaTkāoge kab tak rah-e-ummīd meñ mujh ko

mujh ko mirī manzil kā pata kyoñ nahīñ dete

munsif haiñ agar aap to phir sochnā kaisā

maiñ pyaar kā mujrim huuñ sazā kyoñ nahīñ dete

miT jā.eñge jis vaqt to pachhtānā abas hai

tum aaj vafāoñ kā sila kyoñ nahīñ dete

jo log use bojh samajhte haiñ zamīñ kā

vo 'tāj' ko marne kī duā kyoñ nahīñ dete

main dushman-e-jaan hun to bhula kyon nahin dete

is naqsh-e-tamanna ko miTa kyon nahin dete

bhaTkaoge kab tak rah-e-ummid mein mujh ko

mujh ko meri manzil ka pata kyon nahin dete

munsif hain agar aap to phir sochna kaisa

main pyar ka mujrim hun saza kyon nahin dete

miT jaenge jis waqt to pachhtana abas hai

tum aaj wafaon ka sila kyon nahin dete

jo log use bojh samajhte hain zamin ka

wo 'taj' ko marne ki dua kyon nahin dete