main ek kanch ka paikar wo shaKHs patthar tha

maiñ ek kāñch kā paikar vo shaḳhs patthar thā

so paash paash to honā mirā muqaddar thā

tamām raat sahar kī duā.eñ māñgī thiiñ

khulī jo aañkh to sūraj hamāre sar par thā

charāġh-e-rāh-e-mohabbat hī ban ga.e hote

tamām umr kā jalnā agar muqaddar thā

fasīl-e-shahr pe kitne charāġh the raushan

siyāh raat kā pahrā diloñ ke andar thā

agarche ḳhāna-badoshī hai ḳhushbuoñ kā mizāj

mirā makān to kal raat bhī mo.attar thā

samundaroñ ke safar meñ vo pyaas kā aalam

ki farsh-e-āb pe ik karbalā kā manzar thā

isī sabab to baḌhā e'tibār-e-laġhzish-e-pā

hamārā josh-e-junūñ āgahī kā rahbar thā

jo māhtāb hisār-e-shab-e-siyāh meñ hai

kabhī vo raat ke siine pe misl-e-ḳhanjar thā

maiñ us zamīñ ke liye phuul chun rahā huuñ 'ra.īs'

mirā nasīb jahāñ be-amāñ samundar thā

main ek kanch ka paikar wo shaKHs patthar tha

so pash pash to hona mera muqaddar tha

tamam raat sahar ki duaen mangi thin

khuli jo aankh to suraj hamare sar par tha

charagh-e-rah-e-mohabbat hi ban gae hote

tamam umr ka jalna agar muqaddar tha

fasil-e-shahr pe kitne charagh the raushan

siyah raat ka pahra dilon ke andar tha

agarche KHana-badoshi hai KHushbuon ka mizaj

mera makan to kal raat bhi moattar tha

samundaron ke safar mein wo pyas ka aalam

ki farsh-e-ab pe ek karbala ka manzar tha

isi sabab to baDha e'tibar-e-laghzish-e-pa

hamara josh-e-junun aagahi ka rahbar tha

jo mahtab hisar-e-shab-e-siyah mein hai

kabhi wo raat ke sine pe misl-e-KHanjar tha

main us zamin ke liye phul chun raha hun 'rais'

mera nasib jahan be-aman samundar tha