main fart-e-masarrat se Dar hai ki na mar jaun

maiñ fart-e-masarrat se Dar hai ki na mar jā.ūñ

likkhā hai mujhe us ne maiñ had se guzar jā.ūñ

ik baar hī ho jaa.e ho jaa.e jo honā hai

utrūñ maiñ tire dil meñ yā dil se utar jā.ūñ

jis raah meñ bhī dekhūñ meñ naqsh-e-qadam un kā

mujh par hai adab lāzim ik pal to Thahar jā.ūñ

vo baḌh ke lagā leñge ḳhud mujh ko gale apne

jo sāmne maiñ un ke bā-dīda-tar jā.ūñ

āñkheñ jo atā kī haiñ to ye bhī duā sun le

dekhūñ to use dekhūñ yā jaañ se guzar jā.ūñ

kyuuñ aañkh mirī zālim rah rah ke phaḌaktī hai

mumkin hai vo aa jaa.eñ maiñ bhī to sañvar jā.ūñ

vo bhī to mazā chakkheñ kuchh dard mohabbat kā

achchhā hai ki dil le kar maiñ saaf mukar jā.ūñ

kam-baḳht mohabbat bhī ik rog hai jāñ-levā

mā'lūm nahīñ mujh ko kab jaañ se guzar jā.ūñ

raste kī vahī mushkil manzil kī vahī duurī

aur dil kī vahī hasrat tā-hadd-e-nazar jā.ūñ

palkoñ se chunūñ apnī kāñTe tirī rāhoñ ke

juuñ barg-e-gul-e-hasrat rāhoñ meñ bikhar jā.ūñ

gar chashm-e-karam un kī ho jaa.e kabhī mujh par

fan merā chamak uTThe maiñ aur nikhar jā.ūñ

jis shahr ko chhoḌā thā māyūs-e-vafā ho kar

ab dil kī yahī zid hai vaañ bār-e-digar jā.ūñ

haq baat kahī maiñ ne milnī hai sazā mujh ko

jab manzil-e-dār aa.e mumkin nahīñ Dar jā.ūñ

itnī baḌī duniyā meñ ik un kā sahārā thā

jab vo hī nahīñ ham-dam phir 'soz' kidhar jā.ūñ

main fart-e-masarrat se Dar hai ki na mar jaun

likkha hai mujhe us ne main had se guzar jaun

ek bar hi ho jae ho jae jo hona hai

utrun main tere dil mein ya dil se utar jaun

jis rah mein bhi dekhun mein naqsh-e-qadam un ka

mujh par hai adab lazim ek pal to Thahar jaun

wo baDh ke laga lenge KHud mujh ko gale apne

jo samne main un ke ba-dida-tar jaun

aankhen jo ata ki hain to ye bhi dua sun le

dekhun to use dekhun ya jaan se guzar jaun

kyun aankh meri zalim rah rah ke phaDakti hai

mumkin hai wo aa jaen main bhi to sanwar jaun

wo bhi to maza chakkhen kuchh dard mohabbat ka

achchha hai ki dil le kar main saf mukar jaun

kam-baKHt mohabbat bhi ek rog hai jaan-lewa

ma'lum nahin mujh ko kab jaan se guzar jaun

raste ki wahi mushkil manzil ki wahi duri

aur dil ki wahi hasrat ta-hadd-e-nazar jaun

palkon se chunun apni kanTe teri rahon ke

jun barg-e-gul-e-hasrat rahon mein bikhar jaun

gar chashm-e-karam un ki ho jae kabhi mujh par

fan mera chamak uTThe main aur nikhar jaun

jis shahr ko chhoDa tha mayus-e-wafa ho kar

ab dil ki yahi zid hai wan bar-e-digar jaun

haq baat kahi main ne milni hai saza mujh ko

jab manzil-e-dar aae mumkin nahin Dar jaun

itni baDi duniya mein ek un ka sahaara tha

jab wo hi nahin ham-dam phir 'soz' kidhar jaun