main gam-gam pe jo sans-sans marta hun

maiñ gām-gām pe jo sāñs-sāñs martā huuñ

ye zindagī vo takabbur hai jo maiñ kartā huuñ

sirāt-e-hijr ḳhat-e-mustaqīm hotā hai

maiñ ek par chalūñ to donoñ se guzartā huuñ

ye shash-jihāt mire shānoñ par Thaharte haiñ

ye naqsh baa'd meñ hai pahle maiñ ubhartā huuñ

ajiib ḳhauf hai yaksāniyat se baḌhtā hai

tamām raat maiñ logoñ kī tarh Dartā huuñ

janāb ne man-o-salvā samajh liyā hai mujhe

jo āsmān se un ke liye utartā huuñ

koī nafīs labāda hī zeb-e-tan kar do

maiñ achchhe kapḌe pahan kar agar sañvartā huuñ

main gam-gam pe jo sans-sans marta hun

ye zindagi wo takabbur hai jo main karta hun

siraat-e-hijr KHat-e-mustaqim hota hai

main ek par chalun to donon se guzarta hun

ye shash-jihat mere shanon par Thaharte hain

ye naqsh ba'd mein hai pahle main ubharta hun

ajib KHauf hai yaksaniyat se baDhta hai

tamam raat main logon ki tarh Darta hun

janab ne man-o-salwa samajh liya hai mujhe

jo aasman se un ke liye utarta hun

koi nafis labaada hi zeb-e-tan kar do

main achchhe kapDe pahan kar agar sanwarta hun