main ghar se dur utaq-e-badan mein rahta hun

maiñ ghar se duur utāq-e-badan meñ rahtā huuñ

savād-e-hijr ke bāb-e-kuhan meñ rahtā huuñ

kahīñ to rahnā hai jab tak milā hai izn-e-qayām

so harf-o-saut ke shahr-e-suḳhan meñ rahtā huuñ

maiñ aks huuñ tire pairāhan-e-gul-o-mul kā

maiñ ek rañg huuñ barg-e-saman meñ rahtā huuñ

kabhī huuñ zulf kī zholīdagī meñ vārafta

kabhī maiñ terī jabīñ kī shikan meñ rahtā huuñ

misāl-e-bosa-e-doshīzgān-e-shahr-e-jamāl

tire laboñ ke gulābī chaman meñ rahtā huuñ

miyān-e-chashm-zadan DhūñDh mujh ko palkoñ meñ

kahīñ nahīñ huuñ tilism-zadan meñ rahtā huuñ

jahāñ se tū ne nikālā mire ab-o-jad ko

maiñ aaj bhī usī bāġh-e-adan meñ rahtā huuñ

vahī huā huuñ ġhazāl-e-safā ke naafe meñ

maiñ mushk-e-lā huuñ havā-e-ḳhutan meñ rahtā huuñ

hai panjand kī guzargāh merā nisf ḳhayāl

maiñ nisf vādī-e-gañg-o-jaman meñ rahtā huuñ

zamīn mere liye sair-gāh hai 'mas.ūd'

maiñ shams-zād huuñ niile gagan meñ rahtā huuñ

main ghar se dur utaq-e-badan mein rahta hun

sawad-e-hijr ke bab-e-kuhan mein rahta hun

kahin to rahna hai jab tak mila hai izn-e-qayam

so harf-o-saut ke shahr-e-suKHan mein rahta hun

main aks hun tere pairahan-e-gul-o-mul ka

main ek rang hun barg-e-saman mein rahta hun

kabhi hun zulf ki zholidagi mein warafta

kabhi main teri jabin ki shikan mein rahta hun

misal-e-bosa-e-doshizgan-e-shahr-e-jamal

tere labon ke gulabi chaman mein rahta hun

miyan-e-chashm-zadan DhunDh mujh ko palkon mein

kahin nahin hun tilism-zadan mein rahta hun

jahan se tu ne nikala mere ab-o-jad ko

main aaj bhi usi bagh-e-adan mein rahta hun

wahi hua hun ghazal-e-safa ke nafe mein

main mushk-e-la hun hawa-e-KHutan mein rahta hun

hai panjand ki guzargah mera nisf KHayal

main nisf wadi-e-gang-o-jaman mein rahta hun

zamin mere liye sair-gah hai 'masud'

main shams-zad hun nile gagan mein rahta hun