main guzar raha tha bahisht se khule raston ka tilism tha

maiñ guzar rahā thā bahisht se khule rāstoñ kā tilism thā

mujhe yaad hai mire ḳhvāb meñ tire mausamoñ kā tilism thā

vo siyāh raat kī dāstāñ koī peḌ ho to karūñ bayāñ

mirī shāḳh-e-dil pe ravāñ-davāñ tire jugnuoñ kā tilism thā

vo udaas beloñ ke saa.e the mirī aañkh meñ jo samā.e the

jo galī galī meñ mahak thī vo khule āñganoñ kā tilism thā

kabhī dopahar ke junūn se maiñ jo bach ke soyā sukūn se

mire jism par tire gaañv ke ghane pīpaloñ kā tilism thā

jo chahār-sū ka.ī phuul the vo rafāqatoñ ke rasūl the

mirī zaat par mire mehrbāñ tirī ḳhushbuoñ kā tilism thā

ghane shīshamoñ ke surūr meñ maiñ ghirā huā thā tuyūr meñ

mire ās-pās pahāḌ the dhulī vādiyoñ kā tilism thā

khule pāniyoñ kī jabīn kā maiñ kavī thā apnī zamīn kā

mirī shā'irī ke jazīre par harī bastiyoñ kā tilism thā

main guzar raha tha bahisht se khule raston ka tilism tha

mujhe yaad hai mere KHwab mein tere mausamon ka tilism tha

wo siyah raat ki dastan koi peD ho to karun bayan

meri shaKH-e-dil pe rawan-dawan tere jugnuon ka tilism tha

wo udas belon ke sae the meri aankh mein jo samae the

jo gali gali mein mahak thi wo khule aanganon ka tilism tha

kabhi dopahar ke junun se main jo bach ke soya sukun se

mere jism par tere ganw ke ghane pipalon ka tilism tha

jo chahaar-su kai phul the wo rafaqaton ke rasul the

meri zat par mere mehrban teri KHushbuon ka tilism tha

ghane shishamon ke surur mein main ghira hua tha tuyur mein

mere aas-pas pahaD the dhuli wadiyon ka tilism tha

khule paniyon ki jabin ka main kawi tha apni zamin ka

meri sha'iri ke jazire par hari bastiyon ka tilism tha