main haar kar bhi hua hun isi KHayal se KHush

maiñ haar kar bhī huā huuñ isī ḳhayāl se ḳhush

ki merā apnā hai koī mire zavāl se ḳhush

ibādatoñ meñ bhī ye intihā durust nahīñ

ḳhudā huā hai sadā rāh-e-e'tidāl se ḳhush

Thahar Thahar ke maiñ aage baḌhūñ yā tez chalūñ

zamāna ho nahīñ saktā hai merī chaal se ḳhush

ye moḌ hijr se bad-tar hai apne rishte kā

ki pahle jaise nahīñ hote ham visāl se ḳhush

maiñ apne zaḳhm dikhā.e binā hī lauT gayā

muqābil aa.ina rakkhe thā vo jamāl se ḳhush

uyuub auroñ ke ginte meñ jitnī paa.e ḳhushī

nahīñ hai itnā bashar ḳhud ke bhī kamāl se ḳhush

koī amiir man-o-salvā par bhī ranj kare

koī ġharīb rahe sirf phīkī daal se ḳhush

gale lagā liyā baḌh kar ai haq-bayān tujhe

salīb aise huī hai tirī majāl se ḳhush

main haar kar bhi hua hun isi KHayal se KHush

ki mera apna hai koi mere zawal se KHush

ibaadaton mein bhi ye intiha durust nahin

KHuda hua hai sada rah-e-e'tidal se KHush

Thahar Thahar ke main aage baDhun ya tez chalun

zamana ho nahin sakta hai meri chaal se KHush

ye moD hijr se bad-tar hai apne rishte ka

ki pahle jaise nahin hote hum visal se KHush

main apne zaKHm dikhae bina hi lauT gaya

muqabil aaina rakkhe tha wo jamal se KHush

uyub auron ke ginte mein jitni pae KHushi

nahin hai itna bashar KHud ke bhi kamal se KHush

koi amir man-o-salwa par bhi ranj kare

koi gharib rahe sirf phiki dal se KHush

gale laga liya baDh kar ai haq-bayan tujhe

salib aise hui hai teri majal se KHush