main hun ki hai raqib wafadar kaun hai

maiñ huuñ ki hai raqīb vafādār kaun hai

insāf se kaheñ mirī sarkār kaun hai

pichhle pahar ye shor ḳhabar-dār kaun hai

hushiyār apnī jaan se bezār kaun hai

maiñ kyā batā.ūñ tum ko jafā-kār kaun hai

tum hī kaho ki paikar-e-paikār kaun hai

gulshan bahār sarv saman yā nasīm-e-sub.h

kis ko nahīñ hai un se sarokār kaun hai

bād-e-sabā yā barq ghaTā hashr koī hai

paa.ī ho jis ne aap kī raftār kaun hai

is kaaT ke na tiir na shamshīr na kaTār

teġh-e-adā-e-nāz sā hamvār kaun hai

qaa.em hai tere dam se zamāne kī aabrū

is daur-e-be-tarah meñ tarah-dār kaun hai

jis ne bhare haiñ kaan tumhāre mire ḳhilāf

ham ḳhuub jānte haiñ vo 'ayyār kaun hai

gal jaa.e ye zabāñ jo kahā ho kisī se kuchh

ai chashm-e-nam tire sivā ġhaddār kaun hai

merī taraf to dekhiye maiñ kis ke paas jā.ūñ

merā rafīq-o-mūnis-o-ġham-ḳhvār kaun hai

is ḳhānumāñ-ḳharāb kā ghar hai na koī ghaaT

dil sā ġharīb muflis-o-nādār kaun hai

le de ke ek dil thā so us ko kahāñ dimāġh

kholegā kaun 'uqda-e-asrār kaun hai

main hun ki hai raqib wafadar kaun hai

insaf se kahen meri sarkar kaun hai

pichhle pahar ye shor KHabar-dar kaun hai

hushiyar apni jaan se bezar kaun hai

main kya bataun tum ko jafa-kar kaun hai

tum hi kaho ki paikar-e-paikar kaun hai

gulshan bahaar sarw saman ya nasim-e-subh

kis ko nahin hai un se sarokar kaun hai

baad-e-saba ya barq ghaTa hashr koi hai

pai ho jis ne aap ki raftar kaun hai

is kaT ke na tir na shamshir na kaTar

tegh-e-ada-e-naz sa hamwar kaun hai

qaem hai tere dam se zamane ki aabru

is daur-e-be-tarah mein tarah-dar kaun hai

jis ne bhare hain kan tumhaare mere KHilaf

hum KHub jaante hain wo 'ayyar kaun hai

gal jae ye zaban jo kaha ho kisi se kuchh

ai chashm-e-nam tere siwa ghaddar kaun hai

meri taraf to dekhiye main kis ke pas jaun

mera rafiq-o-munis-o-gham-KHwar kaun hai

is KHanuman-KHarab ka ghar hai na koi ghaT

dil sa gharib muflis-o-nadar kaun hai

le de ke ek dil tha so us ko kahan dimagh

kholega kaun 'uqda-e-asrar kaun hai