main ek asrar tha koi bhi na samjha mujhko

maiñ ik asrār thā koī bhī na samjhā mujh ko

dekhne ko to har ik aañkh ne dekhā mujh ko

yuuñ to jiine ko jiye jaatā huuñ ik muddat se

kaise jiinā hai ye Dhab phir bhī na aaya mujh ko

maiñ masīhā kī tarah haq kā parastār na thā

jaane kyoñ logoñ ne phir daar pe khīñchā mujh ko

maut aa.ī ki ġham-e-zīst ke sahrāoñ meñ

mil gayā ek ghane peḌ kā saaya mujh ko

gardish-e-vaqt ne āñkhoñ ko jilā baḳhshī hai

varna ye chehre bhalā kaun dikhātā mujh ko

naam 'zāhid' hai tabī.at hai magar rindāna

naam badlā na tabī.at ne hī chhoḌā mujh ko

main ek asrar tha koi bhi na samjha mujh ko

dekhne ko to har ek aankh ne dekha mujh ko

yun to jine ko jiye jata hun ek muddat se

kaise jina hai ye Dhab phir bhi na aaya mujh ko

main masiha ki tarah haq ka parastar na tha

jaane kyon logon ne phir dar pe khincha mujh ko

maut aai ki gham-e-zist ke sahraon mein

mil gaya ek ghane peD ka saya mujh ko

gardish-e-waqt ne aankhon ko jila baKHshi hai

warna ye chehre bhala kaun dikhata mujh ko

nam 'zahid' hai tabiat hai magar rindana

nam badla na tabiat ne hi chhoDa mujh ko