main is dil se nikal kar baam-o-dar taqsim karti hun

maiñ is dil se nikal kar bām-o-dar taqsīm kartī huuñ

ki ḳhud be-ghar huuñ aur logoñ meñ ghar taqsīm kartī huuñ

nagar vāloñ meñ jab kotāh-dastī aam hotī hai

maiñ āñdhī kī tarah un meñ samar taqsīm kartī huuñ

havāoñ ke liye kuchh bhī bachā kar maiñ nahīñ rakhtī

ḳhizāñ-rut kī tarah puurā shajar taqsīm kartī huuñ

mire paas us ko dene ke liye itnī mohabbat hai

ki maiñ ḳhud bhī nahīñ bachtī agar taqsīm kartī huuñ

ajab maañ huuñ ki ḳhud to un se aage jā nahīñ saktī

magar maiñ apne bachchoñ meñ safar taqsīm kartī huuñ

isī ḳhātir purāne lafz mere paas aate haiñ

ki maiñ un meñ mohabbat kā asar taqsīm kartī huuñ

maiñ pas-andāz kar saktī nahīñ yādoñ kī daulat ko

agar bach jaa.e to bār-e-digar taqsīm kartī huuñ

sivā lā-hāsilī ke aur hāsil kuchh nahīñ hotā

maiñ jab bhī ḳhud ko us par ai 'qamar' taqsīm kartī huuñ

main is dil se nikal kar baam-o-dar taqsim karti hun

ki KHud be-ghar hun aur logon mein ghar taqsim karti hun

nagar walon mein jab kotah-dasti aam hoti hai

main aandhi ki tarah un mein samar taqsim karti hun

hawaon ke liye kuchh bhi bacha kar main nahin rakhti

KHizan-rut ki tarah pura shajar taqsim karti hun

mere pas us ko dene ke liye itni mohabbat hai

ki main KHud bhi nahin bachti agar taqsim karti hun

ajab man hun ki KHud to un se aage ja nahin sakti

magar main apne bachchon mein safar taqsim karti hun

isi KHatir purane lafz mere pas aate hain

ki main un mein mohabbat ka asar taqsim karti hun

main pas-andaz kar sakti nahin yaadon ki daulat ko

agar bach jae to bar-e-digar taqsim karti hun

siwa la-hasili ke aur hasil kuchh nahin hota

main jab bhi KHud ko us par ai 'qamar' taqsim karti hun