main jaanta hun agar maut darmiyan na ho

maiñ jāntā huuñ agar maut darmiyān na ho

ḳhudā ke naam kī kā'be meñ bhī azaan na ho

agar yaqīñ ho ki ab be-nishāñ nahīñ honā

kisī jabīñ pe kisī farz kā nishān na ho

barā.e-ādmī qaa.em hai daftar-e-aflāk

jo vo na ho to sitāroñ kā ḳhāndān na ho

hai āsmān farishtoñ kī sarzamīn agar

to phir zamīn kahīñ un kā āsmān na ho

usī kī zaat pe khultī hai zaat sūraj kī

ki jis kā dhuup ke mahshar meñ sā.ebān na ho

mahal bahisht meñ hone kā kyā ye matlab hai

ki mere shahr meñ merā koī makān na ho

ḳhudā ke munkiro batlāo kyā ye mumkin hai

ki surḳh uuñT hoñ aur un kā sārbān na ho

ye soch kar haiñ pareshān qissa-go 'vāsif'

jo dāstān hai aadam kī dāstān na ho

main jaanta hun agar maut darmiyan na ho

KHuda ke nam ki ka'be mein bhi azan na ho

agar yaqin ho ki ab be-nishan nahin hona

kisi jabin pe kisi farz ka nishan na ho

barae-admi qaem hai daftar-e-aflak

jo wo na ho to sitaron ka KHandan na ho

hai aasman farishton ki sarzamin agar

to phir zamin kahin un ka aasman na ho

usi ki zat pe khulti hai zat suraj ki

ki jis ka dhup ke mahshar mein saeban na ho

mahal bahisht mein hone ka kya ye matlab hai

ki mere shahr mein mera koi makan na ho

KHuda ke munkiro batlao kya ye mumkin hai

ki surKH unT hon aur un ka sarban na ho

ye soch kar hain pareshan qissa-go 'wasif'

jo dastan hai aadam ki dastan na ho