main jis ki khoj mein sadiyon se ghar nahin aaya

maiñ jis kī khoj meñ sadiyoñ se ghar nahīñ aaya

mirā vajūd usī ko nazar nahīñ aaya

vo baar baar isī rāste se guzrā hai

ye aur baat kabhī mere ghar nahīñ aaya

maiñ jis kī chhāñv meñ kuchh der ruk ke sustā luuñ

rah-e-hayāt meñ aisā shajar nahīñ aaya

ye ittifāq hai jis ne milā diyā varna

maiñ is taraf tirī āvāz par nahīñ aaya

ye kaisī rāh-e-vafā jis meñ na ilzām na sang

koī azaab abhī mere sar nahīñ aaya

davā kī shakl abhī dard se nahīñ miltī

abhī shabāb pe zaḳhm-e-jigar nahīñ aaya

ye kaisī raat hai yā-rab ki ek muddat se

nazar ke sāmne vaqt-e-sahar nahīñ aaya

tamām raat sitāre bujhe bujhe se rahe

magar ghaTā se nikal kar qamar nahīñ aaya

'shakīl' dekh to jā ke kyoñ us kī jānib se

bahut dinoñ se koī nāma-bar nahīñ aaya

main jis ki khoj mein sadiyon se ghar nahin aaya

mera wajud usi ko nazar nahin aaya

wo bar bar isi raste se guzra hai

ye aur baat kabhi mere ghar nahin aaya

main jis ki chhanw mein kuchh der ruk ke susta lun

rah-e-hayat mein aisa shajar nahin aaya

ye ittifaq hai jis ne mila diya warna

main is taraf teri aawaz par nahin aaya

ye kaisi rah-e-wafa jis mein na ilzam na sang

koi azab abhi mere sar nahin aaya

dawa ki shakl abhi dard se nahin milti

abhi shabab pe zaKHm-e-jigar nahin aaya

ye kaisi raat hai ya-rab ki ek muddat se

nazar ke samne waqt-e-sahar nahin aaya

tamam raat sitare bujhe bujhe se rahe

magar ghaTa se nikal kar qamar nahin aaya

'shakil' dekh to ja ke kyon us ki jaanib se

bahut dinon se koi nama-bar nahin aaya