main jis ko bhul jaane ka irada kar raha hun

maiñ jis ko bhuul jaane kā irāda kar rahā huuñ

usī ko yaad pahle se ziyāda kar rahā huuñ

hai ye bhī dūsroñ ko pyaas kā ehsās shāyad

suhānī rut hai aur maiñ tark-e-bāda kar rahā huuñ

mubārak ho jo tū manzil-ba-manzil baḌh rahā hai

to maiñ bhī yaad tujh ko jaada jaada kar rahā huuñ

nahīñ minnat-kash-e-ehsāñ kisī kā rahguzar meñ

maiñ tanhā huuñ safar bhī pā-piyāda kar rahā huuñ

sahā jaatā nahīñ ab ranj-e-mahrūmī-e-manzil

safar hī tark kar duuñ ye irāda kar rahā huuñ

ulajhtā huuñ masāfat kī tavālat se maiñ jitnā

masāfat ko maiñ utnā hī ziyāda kar rahā huuñ

maiñ insāñ huuñ ye mere irtiqā kī hai alāmat

ki maiñ insāniyat ko be-labāda kar rahā huuñ

samātā hī nahīñ koī mirī nāqis nazar meñ

maiñ apnī zaat hī se istifāda kar rahā huuñ

safar bhī ho mayassar vo bhī din qismat dikhā.e

maiñ barsoñ se irāda hī irāda kar rahā huuñ

tire qaul-o-qasam jin ko ki tū bhūlā huā hai

tirī jānib se maiñ un kā i.aada kar rahā huuñ

'vaqār' ajdād kī tārīḳh paḌh luuñ az-sar-e-nau

murattab hī jab apnā ḳhānvāda kar rahā huuñ

main jis ko bhul jaane ka irada kar raha hun

usi ko yaad pahle se ziyaada kar raha hun

hai ye bhi dusron ko pyas ka ehsas shayad

suhani rut hai aur main tark-e-baada kar raha hun

mubarak ho jo tu manzil-ba-manzil baDh raha hai

to main bhi yaad tujh ko jada jada kar raha hun

nahin minnat-kash-e-ehsan kisi ka rahguzar mein

main tanha hun safar bhi pa-piyaada kar raha hun

saha jata nahin ab ranj-e-mahrumi-e-manzil

safar hi tark kar dun ye irada kar raha hun

ulajhta hun masafat ki tawalat se main jitna

masafat ko main utna hi ziyaada kar raha hun

main insan hun ye mere irtiqa ki hai alamat

ki main insaniyat ko be-labaada kar raha hun

samata hi nahin koi meri naqis nazar mein

main apni zat hi se istifada kar raha hun

safar bhi ho mayassar wo bhi din qismat dikhae

main barson se irada hi irada kar raha hun

tere qaul-o-qasam jin ko ki tu bhula hua hai

teri jaanib se main un ka iada kar raha hun

'waqar' ajdad ki tariKH paDh lun az-sar-e-nau

murattab hi jab apna KHanwada kar raha hun