main jis se bhi ek lamhe ko mansub raha hun

maiñ jis se bhī ik lamhe ko mansūb rahā huuñ

ye sach hai har us shaḳhs kā mahbūb rahā huuñ

ik daur thā mujh par bhī bahut log fidā the

ik daur meñ maiñ ḳhuub bahut ḳhuub rahā huuñ

mujh ko bhī mayassar thī faqīrī kī ye daulat

ik 'arse talak yaar maiñ majzūb rahā huuñ

jin logoñ se milnā hī mire bas meñ nahīñ thā

kuchh aise hī logoñ kā maiñ matlūb rahā huuñ

dariyā ke talātum se jo laayā thā bachā kar

ab us kī 'ināyat se hī maiñ Duub rahā huuñ

kuchh aur nayā ho to dikhā de mujhe varna

duniyā tirī raunaq se maiñ ab uub rahā huuñ

ye zindagī ġhurbat meñ guzārī hai ai 'ashraf'

tā-umr magar sāhib-e-uslūb rahā huuñ

main jis se bhi ek lamhe ko mansub raha hun

ye sach hai har us shaKHs ka mahbub raha hun

ek daur tha mujh par bhi bahut log fida the

ek daur mein main KHub bahut KHub raha hun

mujh ko bhi mayassar thi faqiri ki ye daulat

ek 'arse talak yar main majzub raha hun

jin logon se milna hi mere bas mein nahin tha

kuchh aise hi logon ka main matlub raha hun

dariya ke talatum se jo laya tha bacha kar

ab us ki 'inayat se hi main Dub raha hun

kuchh aur naya ho to dikha de mujhe warna

duniya teri raunaq se main ab ub raha hun

ye zindagi ghurbat mein guzari hai ai 'ashraf'

ta-umr magar sahib-e-uslub raha hun