main jo apne haal se kaT gaya to kai zamanon mein baT gaya

maiñ jo apne haal se kaT gayā to ka.ī zamānoñ meñ baT gayā

kabhī kā.enāt bhī kam paḌī kabhī jism-o-jāñ meñ simaT gayā

yahī haal hai ka.ī saal se na qarār-e-dil na sukūn-e-jāñ

kabhī saañs ġham kī ulaT ga.ī kabhī rishta dard se kaT gayā

mirī jītī-jāgtī fasl se ye sulūk bād-e-sumūm kā

mirī kisht-e-fikr ujaḌ ga.ī mirā zehn kāñToñ se paT gayā

na dayār-e-dard meñ chain hai na sukūn dasht-e-ḳhayāl meñ

kabhī lamha bhar ko dhuāñ chhaTā to ġhubār raah meñ aT gayā

na vo aarzū na vo justujū na vo rañg-e-jāma-e-be-rafū

bhalā is vajūd kā vazn kyā jo madār-e-shauq se haT gayā

na vo kaif-e-shab na vo māh-e-shab na vo kārvān-e-ġhazāl-e-shab

jahāñ zikr-e-hijr-o-visāl thā vo varaq hī koī ulaT gayā

main jo apne haal se kaT gaya to kai zamanon mein baT gaya

kabhi kaenat bhi kam paDi kabhi jism-o-jaan mein simaT gaya

yahi haal hai kai sal se na qarar-e-dil na sukun-e-jaan

kabhi sans gham ki ulaT gai kabhi rishta dard se kaT gaya

meri jiti-jagti fasl se ye suluk baad-e-sumum ka

meri kisht-e-fikr ujaD gai mera zehn kanTon se paT gaya

na dayar-e-dard mein chain hai na sukun dasht-e-KHayal mein

kabhi lamha bhar ko dhuan chhaTa to ghubar rah mein aT gaya

na wo aarzu na wo justuju na wo rang-e-jama-e-be-rafu

bhala is wajud ka wazn kya jo madar-e-shauq se haT gaya

na wo kaif-e-shab na wo mah-e-shab na wo karwan-e-ghazal-e-shab

jahan zikr-e-hijr-o-visal tha wo waraq hi koi ulaT gaya