main kabhi makan se guzar gaya kabhi la-makan se guzar gaya

maiñ kabhī makāñ se guzar gayā kabhī lā-makāñ se guzar gayā

tire shauq meñ tujhe kyā ḳhabar maiñ kahāñ kahāñ se guzar gayā

haiñ qadam qadam pe vahāñ vahāñ mirī justujū kī kahāniyāñ

tire sañg-e-dar kī talāsh meñ maiñ jahāñ jahāñ se guzar gayā

maiñ gunāhgār-e-vafā huuñ vo jo talāsh-e-yār ke josh meñ

jahāñ pesh aa.iiñ musībateñ ba-ḳhushī vahāñ se guzar gayā

koī be-ḳhudī sī hai be-ḳhudī mujhe ye bhī hosh nahīñ rahā

tirā dard dil meñ liye maiñ kab tire āstāñ se guzar gayā

mirī rāh-e-farz pe ham-nashīñ kahīñ husn thā kahīñ ishq thā

maiñ ba-fazl-e-mālik-e-do-jahāñ yūñhī darmiyāñ se guzar gayā

kise DhūñDhtī hai nazar tirī yahāñ koī ahl-e-gunah nahīñ

vahī ik 'naresh' thā ai ḳhudā jo tire jahāñ se guzar gayā

main kabhi makan se guzar gaya kabhi la-makan se guzar gaya

tere shauq mein tujhe kya KHabar main kahan kahan se guzar gaya

hain qadam qadam pe wahan wahan meri justuju ki kahaniyan

tere sang-e-dar ki talash mein main jahan jahan se guzar gaya

main gunahgar-e-wafa hun wo jo talash-e-yar ke josh mein

jahan pesh aain musibaten ba-KHushi wahan se guzar gaya

koi be-KHudi si hai be-KHudi mujhe ye bhi hosh nahin raha

tera dard dil mein liye main kab tere aastan se guzar gaya

meri rah-e-farz pe ham-nashin kahin husn tha kahin ishq tha

main ba-fazl-e-malik-e-do-jahan yunhi darmiyan se guzar gaya

kise DhunDhti hai nazar teri yahan koi ahl-e-gunah nahin

wahi ek 'naresh' tha ai KHuda jo tere jahan se guzar gaya