main kah raha hun sar-e-am barmala baba

maiñ kah rahā huuñ sar-e-ām barmalā baabā

gumān hai bhare mele meñ kho gayā baabā

kaḌī hai dhuup tamāzat se paañv jalte haiñ

jo sā.ebān saroñ par thā kyā huā baabā

zarā sī baat pe āñkheñ barasne lagtī haiñ

kahāñ se DhūñD ke lā.ūñgā hausla baabā

tumhāre ba.ad to lamhe nahīñ guzarte haiñ

abhī to umr kā baaqī hai marhala baabā

bas ek umr bachchī hai tumhārī yaad liye

ab apne paas bachā bhī hai aur kyā baabā

rukī jo saañs tumhārī badal ga.ī duniyā

kahāñ vo rabt kisī se jo pahle thā baabā

maiñ tiin pahar se baiThā huā huuñ qabr ke paas

ab apne karb sameTo ki maiñ chalā baabā

agar satāyā zamāne ne zahr khā lūñgā

tumhārā beTā hai 'ashraf' bhī sar-phirā baabā

main kah raha hun sar-e-am barmala baba

guman hai bhare mele mein kho gaya baba

kaDi hai dhup tamazat se panw jalte hain

jo saeban saron par tha kya hua baba

zara si baat pe aankhen barasne lagti hain

kahan se DhunD ke launga hausla baba

tumhaare baad to lamhe nahin guzarte hain

abhi to umr ka baqi hai marhala baba

bas ek umr bachchi hai tumhaari yaad liye

ab apne pas bacha bhi hai aur kya baba

ruki jo sans tumhaari badal gai duniya

kahan wo rabt kisi se jo pahle tha baba

main tin pahar se baiTha hua hun qabr ke pas

ab apne karb sameTo ki main chala baba

agar sataya zamane ne zahr kha lunga

tumhaara beTa hai 'ashraf' bhi sar-phira baba