main kaise lauT ke jaunga apne ghar yaro

maiñ kaise lauT ke jā.ūñgā apne ghar yaaro

ke mere qadmoñ se lipTī hai rahguzar yaaro

na raas aa.egā mujh ko koī shajar yaaro

abhī tavīl bahut hai mirā safar yaaro

abhī to shānoñ pe qaa.em hai merā sar yaaro

junūñ nahīñ hai abhī merā mo'atabar yaaro

sitam to dekhiye parvāz kī duā de kar

kutar rahā hai koī mere bāl-o-par yaaro

vo ek lamha ki jo hāsil-e-hayāt bane

talāsh kartā hai insān umr-bhar yaaro

maiñ āsmāñ huuñ bulandī maqām hai merā

jhukā.e phirtā huuñ phir bhī maiñ apnā sar yaaro

tamām-umr kā hāsil hañsī ghaḌī-bhar kī

kahāñ se laa.e koī phuul kā jigar yaaro

main kaise lauT ke jaunga apne ghar yaro

ke mere qadmon se lipTi hai rahguzar yaro

na ras aaega mujh ko koi shajar yaro

abhi tawil bahut hai mera safar yaro

abhi to shanon pe qaem hai mera sar yaro

junun nahin hai abhi mera mo'atabar yaro

sitam to dekhiye parwaz ki dua de kar

kutar raha hai koi mere baal-o-par yaro

wo ek lamha ki jo hasil-e-hayat bane

talash karta hai insan umr-bhar yaro

main aasman hun bulandi maqam hai mera

jhukae phirta hun phir bhi main apna sar yaro

tamam-umr ka hasil hansi ghaDi-bhar ki

kahan se lae koi phul ka jigar yaro