main kaun hun kya hun main yahi soch raha hun

maiñ kaun huuñ kyā huuñ maiñ yahī soch rahā huuñ

sūrat meñ muqayyad huuñ magar bikhrā huā huuñ

tā-hadd-e-nazar mere sivā koī nahīñ hai

maiñ jaise kisī dard ke sahrā meñ khaḌā huuñ

ye baat mirī soch se bāhar hai abhī tak

maiñ koh thā phir kaise samundar meñ bahā huuñ

ye sach hai kisī kā huuñ maiñ matlūb na tālib

hairāñ huuñ ki kis vāste duniyā meñ jiyā huuñ

be-bas huuñ maiñ ai mujh se ziyā māñgne vaalo

maiñ diip thā jalne se magar pahle bujhā huuñ

'premī' mujhe is baat kā ḳhud ilm nahīñ hai

vo kaun hai maiñ jis ke ḳhayāloñ meñ ghirā huuñ

main kaun hun kya hun main yahi soch raha hun

surat mein muqayyad hun magar bikhra hua hun

ta-hadd-e-nazar mere siwa koi nahin hai

main jaise kisi dard ke sahra mein khaDa hun

ye baat meri soch se bahar hai abhi tak

main koh tha phir kaise samundar mein baha hun

ye sach hai kisi ka hun main matlub na talib

hairan hun ki kis waste duniya mein jiya hun

be-bas hun main ai mujh se ziya mangne walo

main dip tha jalne se magar pahle bujha hun

'premi' mujhe is baat ka KHud ilm nahin hai

wo kaun hai main jis ke KHayalon mein ghira hun