main khil rahi hun KHizan mein ajab saza hai mujhe

maiñ khil rahī huuñ ḳhizāñ meñ 'ajab sazā hai mujhe

na-jāne kaun se mausam kī bad-du'ā hai mujhe

ai merī jaan ke dushman tū ab milā hai mujhe

farāz ne jo likhā thā vahī gila hai mujhe

jo ḳhvāb aañkh ke sab se qarīb rahtā thā

vo zindagī se bahut duur le gayā hai mujhe

vo shaḳhs jis ne mire dil ko taar taar kiyā

sivā.e us ke kahāñ koī aasrā hai mujhe

tirā firāq mirī shā'irī kī ḳhushbū hai

tirā ye ġham hī mire dard kī davā hai mujhe

maiñ apnī palkoñ pe jis ko sajā.e rakhtī thī

vo ḳhvāb TuuT ke āñkhoñ meñ chubh gayā hai mujhe

burā samajh hī liyā hai to phir takalluf kyā

burā hī kahte raho ye bhī kyā burā hai mujhe

ye Dar satāne lagā hai ki kho na duuñ tum ko

tirā ye kahnā mire dil pe aa lagā hai mujhe

ye sochtī huuñ sabhī kuchh luTā diyā kis par

maiñ ab talak huuñ tahī-dast kyā milā hai mujhe

main khil rahi hun KHizan mein 'ajab saza hai mujhe

na-jaane kaun se mausam ki bad-du'a hai mujhe

ai meri jaan ke dushman tu ab mila hai mujhe

faraaz ne jo likha tha wahi gila hai mujhe

jo KHwab aankh ke sab se qarib rahta tha

wo zindagi se bahut dur le gaya hai mujhe

wo shaKHs jis ne mere dil ko tar tar kiya

siwae us ke kahan koi aasra hai mujhe

tera firaq meri sha'iri ki KHushbu hai

tera ye gham hi mere dard ki dawa hai mujhe

main apni palkon pe jis ko sajae rakhti thi

wo KHwab TuT ke aankhon mein chubh gaya hai mujhe

bura samajh hi liya hai to phir takalluf kya

bura hi kahte raho ye bhi kya bura hai mujhe

ye Dar satane laga hai ki kho na dun tum ko

tera ye kahna mere dil pe aa laga hai mujhe

ye sochti hun sabhi kuchh luTa diya kis par

main ab talak hun tahi-dast kya mila hai mujhe