main KHud hi ishq mein majbur hun wafa ke liye

maiñ ḳhud hī ishq meñ majbūr huuñ vafā ke liye

ḳhudā kā vāsta mujh ko na de ḳhudā ke liye

na aam kar tū mazāq-e-jafā ḳhudā ke liye

ye dil bahut hai tire jaur-e-nā-ravā ke liye

thī nā-guzīr fanā ālam-e-baqā ke liye

ik intihā bhī zarūrī thī ibtidā ke liye

mujhe duāoñ se apnī nahīñ umīd-e-asar

magar hanūz maiñ āmāda huuñ duā ke liye

unhīñ ko maañg luuñ un se jo vo ijāzat deñ

maiñ intizār meñ huuñ izn-e-iltijā ke liye

majāz aur haqīqat haiñ sadd-e-rāh-e-jamāl

ye sab fareb haiñ chashm-e-haq-āshnā ke liye

shamīm-e-zulf tirī us ko mil ga.ī shāyad

sukūn aaj mayassar nahīñ sabā ke liye

chaman hai vo haiñ bahāreñ haiñ aur fursat hai

ab intizār hai ghanghor ik ghaTā ke liye

vafā kī koshisheñ fikr-e-visāl ranj-e-firāq

baḌe azaab haiñ ik jān-e-mubtalā ke liye

jahān-e-ishq mukammal nahīñ huā ab tak

makāñ ujaḌ ga.e lākhoñ isī binā ke liye

shikast-e-ahd ġham-e-hijr intizār-e-sahar

davā kahāñ hai mire dard-e-lā-davā ke liye

ye dil hai pahle bhī dil hī thā lekin ab ai dost

banā diyā ise patthar tirī jafā ke liye

ye zauq-e-sair mirā ye tabāhī-e-tūfāñ

maiñ ik vabāl huuñ ai 'mauj' nāḳhudā ke liye

main KHud hi ishq mein majbur hun wafa ke liye

KHuda ka wasta mujh ko na de KHuda ke liye

na aam kar tu mazaq-e-jafa KHuda ke liye

ye dil bahut hai tere jaur-e-na-rawa ke liye

thi na-guzir fana aalam-e-baqa ke liye

ek intiha bhi zaruri thi ibtida ke liye

mujhe duaon se apni nahin umid-e-asar

magar hanuz main aamada hun dua ke liye

unhin ko mang lun un se jo wo ijazat den

main intizar mein hun izn-e-iltija ke liye

majaz aur haqiqat hain sadd-e-rah-e-jamal

ye sab fareb hain chashm-e-haq-ashna ke liye

shamim-e-zulf teri us ko mil gai shayad

sukun aaj mayassar nahin saba ke liye

chaman hai wo hain bahaaren hain aur fursat hai

ab intizar hai ghanghor ek ghaTa ke liye

wafa ki koshishen fikr-e-visal ranj-e-firaq

baDe azab hain ek jaan-e-mubtala ke liye

jahan-e-ishq mukammal nahin hua ab tak

makan ujaD gae lakhon isi bina ke liye

shikast-e-ahd gham-e-hijr intizar-e-sahar

dawa kahan hai mere dard-e-la-dawa ke liye

ye dil hai pahle bhi dil hi tha lekin ab ai dost

bana diya ise patthar teri jafa ke liye

ye zauq-e-sair mera ye tabahi-e-tufan

main ek wabaal hun ai 'mauj' naKHuda ke liye