main KHud ko ek nai duniya dikhane wala hun

maiñ ḳhud ko ik na.ī duniyā dikhāne vaalā huuñ

sū-e-sitāra-o-mahtāb jaane vaalā huuñ

koī farishta mire ghar meñ aane vaalā hai

maiñ farsh-e-rāh pe āñkheñ bichhāne vaalā huuñ

khaḌā huuñ dar pe tire daulat-e-ziyāñ le kar

nikal ke dekh ḳhazāne luTāne vaalā huuñ

tirī bhī aañkh meñ dekhūñgā jū-e-ashk-e-ravāñ

tujhe bhī shahr kā nauha sunāne vaalā huuñ

agar tū Tālne vaalā hai apne vā'de ko

to vā'da kar ke bhalā maiñ kab aane vaalā huuñ

lahū meñ Dūbne vaale haiñ bām-o-dar mere

maiñ teġh-o-sar kī rivāyat bachāne vaalā huuñ

karūñgā ḳhushk zamīñ ko shagufta-o-shādāb

qarīb-e-ḳhema-e-gul nahr laane vaalā huuñ

main KHud ko ek nai duniya dikhane wala hun

su-e-sitara-o-mahtab jaane wala hun

koi farishta mere ghar mein aane wala hai

main farsh-e-rah pe aankhen bichhane wala hun

khaDa hun dar pe tere daulat-e-ziyan le kar

nikal ke dekh KHazane luTane wala hun

teri bhi aankh mein dekhunga ju-e-ashk-e-rawan

tujhe bhi shahr ka nauha sunane wala hun

agar tu Talne wala hai apne wa'de ko

to wa'da kar ke bhala main kab aane wala hun

lahu mein Dubne wale hain baam-o-dar mere

main tegh-o-sar ki riwayat bachane wala hun

karunga KHushk zamin ko shagufta-o-shadab

qarib-e-KHema-e-gul nahr lane wala hun