main KHuda bhi to nahin kyun mujhe tanha likh de

maiñ ḳhudā bhī to nahīñ kyuuñ mujhe tanhā likh de

ab mire naam kī suulī pe masīhā likh de

aise sannāTe se behtar hai shikastoñ kī sadā

merī miTTī meñ ik uḌtā huā pattā likh de

de vo unvāñ ki zarūrat na kahānī kī paḌe

bāġhbāñ sabze pe ḳhākistar-e-ġhuncha likh de

raat bhar tere ujāloñ kī qasam khā.ūñ maiñ

tū sar-e-shām marī sham.a kā bujhnā likh de

ho chuke ḳhushk mirī aañkh ke chashme kab ke

sāmne dasht hai ik abr kā TukḌā likh de

phuul kā zikr bhī karte hue Dar lagtā hai

phir na tū merī zabāñ par kahīñ kāñTā likh de

daaġh us ek kalī kā na miTegā hargiz

merī jholī meñ agar baaġh bhī saarā likh de

saañs lete hue raakh uḌtī hai ab chehre par

na bujhā aag magar saath hī chashma likh de

bevafā.ī kī shikāyat use kyā logoñ se

jis kī rāhoñ meñ tū bachhḌā huā pyārā likh de

ab to is aas pe jiite haiñ ki shāyad 'hashamī'

likhne vaale ne jo ab tak nahīñ likkhā likh de

main KHuda bhi to nahin kyun mujhe tanha likh de

ab mere nam ki suli pe masiha likh de

aise sannaTe se behtar hai shikaston ki sada

meri miTTi mein ek uDta hua patta likh de

de wo unwan ki zarurat na kahani ki paDe

baghban sabze pe KHakistar-e-ghuncha likh de

raat bhar tere ujalon ki qasam khaun main

tu sar-e-sham mari shama ka bujhna likh de

ho chuke KHushk meri aankh ke chashme kab ke

samne dasht hai ek abr ka TukDa likh de

phul ka zikr bhi karte hue Dar lagta hai

phir na tu meri zaban par kahin kanTa likh de

dagh us ek kali ka na miTega hargiz

meri jholi mein agar bagh bhi sara likh de

sans lete hue rakh uDti hai ab chehre par

na bujha aag magar sath hi chashma likh de

bewafai ki shikayat use kya logon se

jis ki rahon mein tu bachhDa hua pyara likh de

ab to is aas pe jite hain ki shayad 'hashami'

likhne wale ne jo ab tak nahin likkha likh de