main KHwab-gah-e-zat ke andar nahin rahta

maiñ ḳhvāb-gah-e-zāt ke andar nahīñ rahtā

insān huuñ māhaul se kaT kar nahīñ rahtā

mil jaatī hai malbe se kisī naam kī taḳhtī

dastār to rahtī hai magar sar nahīñ rahtā

vo phuul hai gulchīñ kī rasā.ī nahīñ us tak

aahū hai magar tiir kī zad par nahīñ rahtā

us vaqt satātī hai hameñ niiñd kī devī

jab ek sitāra bhī falak par nahīñ rahtā

asbāb-e-safar le ke nikalte nahīñ ghar se

is vāste luTne kā hameñ Dar nahīñ rahtā

har shaḳhs kī bātoñ se ye andāza huā hai

is shahr meñ koī bhī qad-āvar nahīñ rahtā

kashtī kā safar achchhā lagā hai mujhe 'nāsir'

ab pesh-e-nazar ek hī manzar nahīñ rahtā

main KHwab-gah-e-zat ke andar nahin rahta

insan hun mahaul se kaT kar nahin rahta

mil jati hai malbe se kisi nam ki taKHti

dastar to rahti hai magar sar nahin rahta

wo phul hai gulchin ki rasai nahin us tak

aahu hai magar tir ki zad par nahin rahta

us waqt satati hai hamein nind ki dewi

jab ek sitara bhi falak par nahin rahta

asbab-e-safar le ke nikalte nahin ghar se

is waste luTne ka hamein Dar nahin rahta

har shaKHs ki baaton se ye andaza hua hai

is shahr mein koi bhi qad-awar nahin rahta

kashti ka safar achchha laga hai mujhe 'nasir'

ab pesh-e-nazar ek hi manzar nahin rahta