main ki waqf-e-gham-e-dauran na hua tha so hua

maiñ ki vaqf-e-ġham-e-daurāñ na huā thā so huā

chaak ab tak jo garebāñ na huā thā so huā

paar dil ke koī paikāñ na huā thā so huā

yuuñ kabhī dard kā darmāñ na huā thā so huā

koī va.ada koī paimāñ na huā thā so huā

itnā nādāñ dil-e-nādāñ na huā thā so huā

Dūbte rahte the har roz hazāroñ sūraj

phir bhī ashkoñ se charāġhāñ na huā thā so huā

kyā kahūñ lāla-e-pur-ḳhūñ ko ki jis ke baa.is

mushtahar jo ġham-e-insāñ na huā thā so huā

is se pahle ki tirī yaad ke bādal chhā.eñ

mujh ko andāza-e-tūfāñ na huā thā so huā

hai asar merī hī āshufta-sarī kā shāyad

vo mujhe dekh ke hairāñ na huā thā so huā

haa.e vo ek nazar lutf-o-karam se jis ke

tujh se bhī jo ġham-e-daurāñ na huā thā so huā

shukriya un ke sitam kā ki yuuñ hī ai 'iqbāl'

aaj tak mujh pe jo ehsāñ na huā thā so huā

main ki waqf-e-gham-e-dauran na hua tha so hua

chaak ab tak jo gareban na hua tha so hua

par dil ke koi paikan na hua tha so hua

yun kabhi dard ka darman na hua tha so hua

koi wada koi paiman na hua tha so hua

itna nadan dil-e-nadan na hua tha so hua

Dubte rahte the har roz hazaron suraj

phir bhi ashkon se charaghan na hua tha so hua

kya kahun lala-e-pur-KHun ko ki jis ke bais

mushtahar jo gham-e-insan na hua tha so hua

is se pahle ki teri yaad ke baadal chhaen

mujh ko andaza-e-tufan na hua tha so hua

hai asar meri hi aashufta-sari ka shayad

wo mujhe dekh ke hairan na hua tha so hua

hae wo ek nazar lutf-o-karam se jis ke

tujh se bhi jo gham-e-dauran na hua tha so hua

shukriya un ke sitam ka ki yun hi ai 'iqbaal'

aaj tak mujh pe jo ehsan na hua tha so hua