main kis waraq ko chhupaun dikhaun kaun sa bab

maiñ kis varaq ko chhupā.ūñ dikhā.ūñ kaun sā baab

kisī habīb ne māñgī hai zindagī kī kitāb

hameñ na bhūlnā ālām-e-sad-zamāñ ki yahāñ

hamīñ haiñ maskan-e-hirmāñ hamīñ haiñ bait-e-azāb

inhī se shab meñ ujālā inhī se nūr-e-ḳhayāl

mire liye to bahut kuchh haiñ dīda-e-be-ḳhvāb

gayā thā dasht se uTh kar samundaroñ kī taraf

vahāñ bhī tishna-nasībī vahāñ bhī marg-e-sarāb

pakaḌ ke dāman-e-dil yā jhukā ke sar apnā

diyā hai ḳhvāb-e-shikasta kā har kisī ko hisāb

mire kalām kī tafsīr ke liye paḌhiye

jamāl-e-fikr kī aayat navā-e-jāñ kī kitāb

vo āñkheñ pyaar ke lahje meñ kah rahī thiiñ 'hasan'

hamīñ se maañg piyāla hamīñ se maañg sharāb

havā bahār ke mausam meñ yuuñ chalī ki 'na.īm'

na surḳh-rū thā gulistāñ na surḳh-rū the gulāb

main kis waraq ko chhupaun dikhaun kaun sa bab

kisi habib ne mangi hai zindagi ki kitab

hamein na bhulna aalam-e-sad-zaman ki yahan

hamin hain maskan-e-hirman hamin hain bait-e-azab

inhi se shab mein ujala inhi se nur-e-KHayal

mere liye to bahut kuchh hain dida-e-be-KHwab

gaya tha dasht se uTh kar samundaron ki taraf

wahan bhi tishna-nasibi wahan bhi marg-e-sarab

pakaD ke daman-e-dil ya jhuka ke sar apna

diya hai KHwab-e-shikasta ka har kisi ko hisab

mere kalam ki tafsir ke liye paDhiye

jamal-e-fikr ki aayat nawa-e-jaan ki kitab

wo aankhen pyar ke lahje mein kah rahi thin 'hasan'

hamin se mang piyala hamin se mang sharab

hawa bahaar ke mausam mein yun chali ki 'naim'

na surKH-ru tha gulistan na surKH-ru the gulab