main kiye jaunga taqsir kahan tak aaKHir

maiñ kiye jā.ūñgā taqsīr kahāñ tak āḳhir

tū na degā mujhe ta.azīr kahāñ tak āḳhir

mere har harf kī tafsīr kahāñ tak āḳhir

jazba-e-shauq kī tash.hīr kahāñ tak āḳhir

ye kisī taur bhī pāband nahīñ ho saktī

pā-e-taḳhyīl meñ zanjīr kahāñ tak āḳhir

naql phir naql hai kyā asl se nisbat us ko

dil ko bahlā.egī tasvīr kahāñ tak āḳhir

der to hotī hai andher nahīñ hotā hai

yuuñ sahī phir bhī ye tāḳhīr kahāñ tak āḳhir

maiñ to har raat na.e ḳhvāb ke letā huuñ maze

aap farmā.eñge ta.abīr kahāñ tak āḳhir

ise sharminda-e-īsār-o-amal hone de

kaam degī tirī taqrīr kahāñ tak āḳhir

aur uljheñge tashaddud se masā.il ai dost

ye har ik baat meñ shamshīr kahāñ tak āḳhir

harf aatā hai mirī himmat-e-mardāna par

shikva-e-gardish-e-taqdīr kahāñ tak āḳhir

jaane kyuuñ chashm-e-karam phir ga.ī terī mujh se

maiñ rahūñ ḳhasta-o-dil-gīr kahāñ tak āḳhir

kabhī hogā bhī asar merī duā meñ shāmil

uf ye mahrūmī-e-tāsīr kahāñ tak āḳhir

kuchh izāfa bhī to lāzim hai adab meñ hamdam

ye faqat pairvī-e-'mīr' kahāñ tak āḳhir

kabhī rāzī-ba-razā ho ke bhī dekho 'tālib'

har nafas koshish-o-tadbīr kahāñ tak āḳhir

main kiye jaunga taqsir kahan tak aaKHir

tu na dega mujhe tazir kahan tak aaKHir

mere har harf ki tafsir kahan tak aaKHir

jazba-e-shauq ki tashhir kahan tak aaKHir

ye kisi taur bhi paband nahin ho sakti

pa-e-taKHyil mein zanjir kahan tak aaKHir

naql phir naql hai kya asl se nisbat us ko

dil ko bahlaegi taswir kahan tak aaKHir

der to hoti hai andher nahin hota hai

yun sahi phir bhi ye taKHir kahan tak aaKHir

main to har raat nae KHwab ke leta hun maze

aap farmaenge tabir kahan tak aaKHir

ise sharminda-e-isar-o-amal hone de

kaam degi teri taqrir kahan tak aaKHir

aur uljhenge tashaddud se masail ai dost

ye har ek baat mein shamshir kahan tak aaKHir

harf aata hai meri himmat-e-mardana par

shikwa-e-gardish-e-taqdir kahan tak aaKHir

jaane kyun chashm-e-karam phir gai teri mujh se

main rahun KHasta-o-dil-gir kahan tak aaKHir

kabhi hoga bhi asar meri dua mein shamil

uf ye mahrumi-e-tasir kahan tak aaKHir

kuchh izafa bhi to lazim hai adab mein hamdam

ye faqat pairwi-e-'mir' kahan tak aaKHir

kabhi raazi-ba-raza ho ke bhi dekho 'talib'

har nafas koshish-o-tadbir kahan tak aaKHir