main koi gul hun ki sar apne chaDhao logo

maiñ koī gul huuñ ki sar apne chaḌhāo logo

maiñ to huuñ qarz mujhe sar se utāro logo

kyā kināre pe khaḌe soch rahe ho logo

man ke sāgar meñ bhī to ġhota lagāo logo

tā-ba-ke yūñhī tasavvur meñ tarāshoge sanam

kyoñ tasavvur ko na tasvīr meñ Dhālo logo

chashm-e-dīvār se jis kī na Tapaktā ho lahū

shahr meñ ek bhī ghar aisā dikhā do logo

muñh ke bal ḳhud na kahīñ gir paḌe sar-afrāzī

be-dhaḌak saa.e ke pīchhe to na dauḌo logo

jin kā vijdān latāfat se ho yaksar aarī

aise naqqādoñ se lillāh bachāo logo

main koi gul hun ki sar apne chaDhao logo

main to hun qarz mujhe sar se utaro logo

kya kinare pe khaDe soch rahe ho logo

man ke sagar mein bhi to ghota lagao logo

ta-ba-ke yunhi tasawwur mein tarashoge sanam

kyon tasawwur ko na taswir mein Dhaalo logo

chashm-e-diwar se jis ki na Tapakta ho lahu

shahr mein ek bhi ghar aisa dikha do logo

munh ke bal KHud na kahin gir paDe sar-afraazi

be-dhaDak sae ke pichhe to na dauDo logo

jin ka wijdan latafat se ho yaksar aari

aise naqqadon se lillah bachao logo