main kya bataun ki maqsud-e-justuju kya hai

maiñ kyā batā.ūñ ki maqsūd-e-justujū kyā hai

mirī nigāh ko sadiyoñ se aarzū kyā hai

ye raaz mujh ko batāyā tirī nigāhoñ ne

jo ḳhāmushī hai takallum to guftugū kyā hai

jo koī pūchhe to maiñ ḳhud batā nahīñ saktā

mire shu.ūr meñ mafhūm-e-rang-o-bū kyā hai

kise ḳhabar hai ki kab us ne bolnā sīkhā

koī batā.e ki tārīḳh-e-guftugū kyā hai

jab is meñ ahl-e-junūñ hī nahīñ hue shāmil

to phir ye shahr meñ taqrīb-e-hā-o-hū kyā hai

ye abrahā ke pujārī ye ahraman ke supūt

inheñ ḳhabar hī nahīñ hai ki sulh-jū kyā hai

vufūr-e-dard se āñkheñ chhalaktī rahtī haiñ

maiñ mast-e-ġham huuñ mujhe hājat-e-subū kyā hai

ukhaḌ ga.e haiñ bahar-gām paañv tūfāñ ke

ḳhudā ho saath to phir sāzish-e-adū kyā hai

'sirāj' bhuul ga.e tum bhī is haqīqat ko

dayār-e-nang meñ tashkīl-e-ābrū kyā hai

main kya bataun ki maqsud-e-justuju kya hai

meri nigah ko sadiyon se aarzu kya hai

ye raaz mujh ko bataya teri nigahon ne

jo KHamushi hai takallum to guftugu kya hai

jo koi puchhe to main KHud bata nahin sakta

mere shuur mein mafhum-e-rang-o-bu kya hai

kise KHabar hai ki kab us ne bolna sikha

koi batae ki tariKH-e-guftugu kya hai

jab is mein ahl-e-junun hi nahin hue shamil

to phir ye shahr mein taqrib-e-ha-o-hu kya hai

ye abraha ke pujari ye ahraman ke suput

inhen KHabar hi nahin hai ki sulh-ju kya hai

wufur-e-dard se aankhen chhalakti rahti hain

main mast-e-gham hun mujhe hajat-e-subu kya hai

ukhaD gae hain bahar-gam panw tufan ke

KHuda ho sath to phir sazish-e-adu kya hai

'siraj' bhul gae tum bhi is haqiqat ko

dayar-e-nang mein tashkil-e-abru kya hai