main kya kahun ki haal hai kya hijr-e-yar mein

maiñ kyā kahūñ ki haal hai kyā hijr-e-yār meñ

dil iḳhtiyār meñ na jigar iḳhtiyār meñ

dushman ko dekhte haiñ kanakhiyoñ se bazm meñ

kuchh shoḳhiyāñ bhī haiñ nigah-e-sharmsār meñ

rizvāñ ko bhī to hai tirī mahfil kī aarzū

merā hai kyā hisāb maiñ huuñ kis shumār meñ

jaane na dūñgā phir dil-e-nādāñ ko haath se

aa jaa.e ab kī gar vo mire iḳhtiyār meñ

un kā masal masal ke mire dil ko pūchhnā

kyoñ dard ho rahā hai dil-e-be-qarār meñ

surma lagā rahe haiñ vo mere ġhubār kā

miT kar samā gayā huuñ ġharaz chashm-e-yār meñ

vaa.iz kī bahkī bātoñ meñ aa.uuñ ḳhudā kī shaan

maiñ aur mai se tauba karūñ aur bahār meñ

'nashtar' vo din kahāñ haiñ vo rāteñ kidhar ga.iiñ

qaabū meñ thā vo shoḳh to dil iḳhtiyār meñ

main kya kahun ki haal hai kya hijr-e-yar mein

dil iKHtiyar mein na jigar iKHtiyar mein

dushman ko dekhte hain kanakhiyon se bazm mein

kuchh shoKHiyan bhi hain nigah-e-sharmsar mein

rizwan ko bhi to hai teri mahfil ki aarzu

mera hai kya hisab main hun kis shumar mein

jaane na dunga phir dil-e-nadan ko hath se

aa jae ab ki gar wo mere iKHtiyar mein

un ka masal masal ke mere dil ko puchhna

kyon dard ho raha hai dil-e-be-qarar mein

surma laga rahe hain wo mere ghubar ka

miT kar sama gaya hun gharaz chashm-e-yar mein

waiz ki bahki baaton mein aaun KHuda ki shan

main aur mai se tauba karun aur bahaar mein

'nashtar' wo din kahan hain wo raaten kidhar gain

qabu mein tha wo shoKH to dil iKHtiyar mein